صحيح الادب المفرد

سیدنا جابر رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم مدینہ میں ایک گھوڑے سے کھجور کے ایک تنے پر گر پڑے، جس سے آپ کا قدم (جوڑ سے) ہٹ گیا۔ ہم سیدہ عائشہ رضی اللہ عنہا کے ایک بالا خانے میں آپ کی عیادت کیا کرتے تھے۔ ہم آپ کے پاس آئے تو آپ بیٹھ کر نماز پڑھ رہے تھے، ہم نے کھڑے ہو کر نماز پڑھی۔ پھر ہم دوسری بار آپ کے پاس آئے تو آپ فرض نماز بیٹھ کر پڑھ رہے تھے، ہم نے آپ کے پیچھے کھڑے ہو کر نماز پڑھی، تو آپ نے ہمیں اشارہ کیا کہ بیٹھ جاؤ۔ جب آپ نماز پوری کر چکے تو فرمایا: ”جب امام بیٹھ کر نماز پڑھے تو تم بھی بیٹھ کر پڑھو، اور جب وہ کھڑے ہو کر پڑھے تو تم بھی کھڑے ہو کر پڑھو، اور جب امام بیٹھا ہو تو تم کھڑے نہ رہو، جیسے فارس والے اپنے بڑوں کے ساتھ کرتے ہیں۔“

(سیدنا جابر رضی اللہ عنہ نے) کہا: انصار میں سے فلاں کے ہاں ایک لڑکا پیدا ہوا تو اس نے اس کا نام محمد رکھا۔ انصار نے کہا: ہم تمہیں رسول اللہ صلی اللہ علیہ وسلم کی کنیت سے نہیں پکاریں گے۔ یہاں تک کہ ہم (آپ کے انتظار میں) راستے میں بیٹھ گئے، ہم آپ سے قیامت کے بارے میں پوچھنا چاہتے تھے۔ آپ نے فرمایا: ”تم میرے پاس قیامت کے بارے میں پوچھنے آئے ہو؟“ ہم نے عرض کیا: جی ہاں۔ آپ نے فرمایا: ”کوئی جاندار (جو آج زندہ ہے) ایسا نہیں کہ اس پر سو سال گزریں (اور وہ زندہ رہے)۔“ ہم نے عرض کیا: انصار میں سے فلاں کے ہاں ایک لڑکا پیدا ہوا تو اس نے اس کا نام محمد رکھا، اور انصار نے کہا: ہم تمہیں رسول اللہ صلی اللہ علیہ وسلم کی کنیت سے نہیں پکاریں گے۔ آپ نے فرمایا: ”انصار نے اچھا کیا۔ میرے نام پر نام رکھو اور میری کنیت پر کنیت نہ رکھو۔“