صحيح الادب المفرد

سیدنا ابوہریرہ رضی اللہ عنہ سے روایت ہے، انہوں نے کہا: میں نے نبی صلی اللہ علیہ وسلم کو فرماتے ہوئے سنا: ”اس دوران کہ ایک چرواہا اپنی بکریوں میں تھا، ایک بھیڑیے نے اس پر حملہ کیا اور اس سے ایک بکری لے گیا۔ چرواہے نے اس کا پیچھا کیا تو بھیڑیا اس کی طرف متوجہ ہوا اور کہنے لگا: درندوں والے دن اس کی حفاظت کون کرے گا، جس دن میرے سوا اس کا کوئی چرواہا نہ ہوگا؟“ لوگوں نے کہا: سبحان اللہ! تو رسول اللہ صلی اللہ علیہ وسلم نے فرمایا: ”میں اس بات پر ایمان رکھتا ہوں، اور ابوبکر اور عمر بھی۔“

سیدنا علی رضی اللہ عنہ سے روایت ہے، انہوں نے کہا: نبی صلی اللہ علیہ وسلم ایک جنازے میں تھے، آپ نے کوئی چیز پکڑی اور اس سے زمین کریدنے لگے، پھر فرمایا: ”تم میں سے کوئی ایک بھی ایسا نہیں جس کا ٹھکانا جہنم میں اور جس کا ٹھکانا جنت میں لکھا نہ جا چکا ہو۔“ صحابہ نے عرض کیا: اللہ کے رسول! کیا ہم اپنے لکھے ہوئے پر بھروسہ کر کے عمل نہ چھوڑ دیں؟ آپ صلی اللہ علیہ وسلم نے فرمایا: ”عمل کرو! ہر ایک کے لیے وہی آسان کر دیا جاتا ہے جس کے لیے وہ پیدا کیا گیا ہے۔“ اور فرمایا: ”جو اہل سعادت میں سے ہوگا اس کے لیے سعادت کا عمل آسان کر دیا جائے گا، اور جو اہل شقاوت میں سے ہوگا اس کے لیے شقاوت کا عمل آسان کر دیا جائے گا۔“ پھر آپ نے یہ آیات پڑھیں: «فأما من أعطى واتقى، وصدق بالحسنى» ”تو جس نے (اللہ کی راہ میں) دیا اور تقویٰ اختیار کیا اور اچھی بات کی تصدیق کی“ آخر آیات تک [اللیل: 5-7]۔