صحيح الادب المفرد

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”میرے نام پر نام رکھو اور میری کنیت پر کنیت نہ رکھو، کیونکہ میں ہی ابوالقاسم ہوں۔“

سیدنا انس بن مالک رضی اللہ عنہ سے روایت ہے، انہوں نے کہا: نبی صلی اللہ علیہ وسلم بازار میں تھے کہ ایک آدمی نے پکارا: اے ابوالقاسم! تو نبی صلی اللہ علیہ وسلم نے اس کی طرف مڑ کر دیکھا۔ اس نے عرض کیا: اے اللہ کے رسول! میں نے تو اس (دوسرے آدمی) کو پکارا تھا۔ تو نبی صلی اللہ علیہ وسلم نے فرمایا: ”میرے نام پر نام رکھو اور میری کنیت پر کنیت نہ رکھو۔“

سیدنا یوسف بن عبداللہ بن سلام رضی اللہ عنہما سے روایت ہے، انہوں نے کہا: ”نبی صلی اللہ علیہ وسلم نے میرا نام یوسف رکھا، مجھے اپنی گود میں بٹھایا اور میرے سر پر ہاتھ پھیرا۔“

سیدنا جابر بن عبداللہ رضی اللہ عنہما سے روایت ہے، انہوں نے کہا: ہم انصار میں سے ایک آدمی کے ہاں لڑکا پیدا ہوا اور اس نے اس کا نام محمد رکھنے کا ارادہ کیا - (یہاں ایک روایت میں ہے کہ انصاری نے کہا: میں نے اسے اپنی گردن پر اٹھایا اور نبی صلی اللہ علیہ وسلم کے پاس لے آیا) اور ایک دوسری روایت میں ہے: اس کے ہاں لڑکا پیدا ہوا تو انہوں نے ارادہ کیا کہ وہ اس کا نام محمد رکھے - تو آپ صلی اللہ علیہ وسلم نے فرمایا: ”میرے نام پر نام رکھو اور میری کنیت پر کنیت نہ رکھو، کیونکہ مجھے تو قاسم (تقسیم کرنے والا) بنایا گیا ہے (اور ایک تیسری روایت میں ہے: بھیجا گیا ہے)، میں تمہارے درمیان تقسیم کرتا ہوں۔“

سیدنا ابوموسیٰ رضی اللہ عنہ سے روایت ہے، انہوں نے کہا: ”میرے ہاں ایک لڑکا پیدا ہوا تو میں اسے نبی صلی اللہ علیہ وسلم کے پاس لے آیا، آپ نے اس کا نام ابراہیم رکھا، کھجور سے اس کی گھٹی دی، اس کے لیے برکت کی دعا فرمائی اور اسے مجھے واپس دے دیا۔“ اور یہ ابوموسیٰ کی اولاد میں سب سے بڑے تھے۔