المستدرك على الصحيحين

سیدہ عائشہ رضی اللہ عنہا سے روایت ہے، انہوں نے کہا: میں نے رسول اللہ ﷺ کو یہ دعا کرتے ہوئے سنا: «اللّٰهُمَّ حَاسِبْنِي حِسَابًا يَسِيرًا» ”اے اللہ! مجھ سے آسان حساب لے۔“ میں نے عرض کی: اے اللہ کے رسول! آسان حساب سے کیا مراد ہے؟ آپ ﷺ نے فرمایا: ”یہ کہ اس کے اعمال نامے پر نظر ڈالی جائے اور اس سے درگزر کر دیا جائے، بے شک اس دن جس سے حساب میں جرح (باریک بینی) کی گئی وہ ہلاک ہو گیا، اور مومن کو جو بھی تکلیف پہنچتی ہے اللہ تعالیٰ اس کے بدلے اس کے گناہ مٹا دیتا ہے، یہاں تک کہ وہ کانٹا بھی جو اسے چبھتا ہے۔“
یہ حدیث امام مسلم کی شرط پر صحیح ہے، لیکن شیخین نے اسے اس سیاق کے ساتھ روایت نہیں کیا۔ اور اس کا شاہد سیدہ عائشہ رضی اللہ عنہا سے (درج ذیل) ہے:

سیدہ عائشہ رضی اللہ عنہا سے روایت ہے، انہوں نے کہا: رسول اللہ ﷺ میرے پاس سے گزرے جبکہ میں اپنے ہاتھ اٹھائے ہوئے یہ دعا کر رہی تھی: «اللّٰهُمَّ حَاسِبْنِي حِسَابًا يَسِيرًا» ”اے اللہ! مجھ سے آسان حساب لے۔“ تو رسول اللہ ﷺ نے فرمایا: ”کیا تم جانتی ہو کہ وہ (آسان) حساب کیا ہے؟“ میں نے عرض کی: اللہ عزوجل نے اپنی کتاب میں ذکر فرمایا ہے: ﴿فَسَوْفَ يُحَاسَبُ حِسَابًا يَسِيرًا﴾ ”تو عنقریب اس سے آسان حساب لیا جائے گا۔“ [سورة الانشقاق: 8] تو آپ ﷺ نے مجھ سے فرمایا: ”اے عائشہ! بے شک جس کا (اس دن باقاعدہ) حساب لیا گیا وہ مارا گیا، یہ (آسان حساب) تو محض اللہ تعالیٰ کے سامنے اعمال کی پیشی کا نام ہے۔“