المستدرك على الصحيحين

سیدنا عبداللہ بن معقل رضی اللہ عنہ سے روایت ہے کہ میں اور میرے والد سیدنا عبداللہ بن مسعود رضی اللہ عنہ کی خدمت میں حاضر ہوئے، تو میرے والد نے ان سے پوچھا: کیا آپ نے نبی کریم ﷺ کو یہ فرماتے ہوئے سنا ہے کہ: ”ندامت ہی توبہ ہے؟“ انہوں نے جواب دیا: ہاں، میں نے آپ ﷺ کو یہ فرماتے ہوئے سنا ہے کہ: ”ندامت ہی توبہ ہے۔“

سیدنا عبداللہ بن معقل رضی اللہ عنہ سے روایت ہے کہ میں اپنے والد کے ہمراہ سیدنا عبداللہ بن مسعود رضی اللہ عنہ کے پاس گیا، تو میرے والد نے پوچھا: کیا آپ نے رسول اللہ ﷺ کو فرماتے ہوئے سنا ہے کہ: ”ندامت ہی توبہ ہے؟“ انہوں نے فرمایا: ہاں، میں نے رسول اللہ ﷺ کو فرماتے ہوئے سنا ہے کہ: ”ندامت ہی توبہ ہے۔“
یہ حدیث صحیح الاسناد ہے لیکن شیخین نے ان الفاظ کے ساتھ اسے روایت نہیں کیا، البتہ ان دونوں نے حدیثِ افک پر اتفاق کیا ہے جس میں رسول اللہ ﷺ نے سیدہ عائشہ رضی اللہ عنہا سے فرمایا تھا: ”اگر تم اس معاملے سے بَری ہو تو اللہ عنقریب تمہاری برات ظاہر فرما دے گا، اور اگر تم سے کوئی گناہ سرزد ہوا ہے تو اللہ سے مغفرت مانگو اور اس کے حضور توبہ کرو، کیونکہ بندہ جب اپنے گناہ کا اعتراف کر کے توبہ کرتا ہے تو اللہ اس کی توبہ قبول فرما لیتا ہے۔“

سیدنا انس بن مالک رضی اللہ عنہ سے روایت ہے، راوی کہتے ہیں کہ میں نے ان سے پوچھا: کیا آپ نے نبی کریم ﷺ کو فرماتے ہوئے سنا ہے کہ: ”ندامت ہی توبہ ہے؟“ تو انہوں نے جواب دیا: ہاں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔