المستدرك على الصحيحين

ابو الاسود سلمی اپنے والد اور وہ اپنے دادا رضی اللہ عنہ سے روایت کرتے ہیں، انہوں نے کہا کہ میں ایک سفر میں رسول اللہ ﷺ کے ساتھ سات افراد میں سے ساتواں تھا، تو عید الاضحی کا وقت آ گیا، چنانچہ رسول اللہ ﷺ نے ہمیں حکم دیا تو ہم میں سے ہر شخص نے ایک ایک درہم جمع کیا اور ہم نے سات درہم میں ایک قربانی کا جانور خریدا، ہم نے عرض کیا: اے اللہ کے رسول ﷺ! ہم نے اسے مہنگے داموں خریدا ہے، تو آپ ﷺ نے فرمایا: ”بے شک بہترین قربانیاں وہ ہیں جو سب سے زیادہ قیمتی اور سب سے زیادہ فربہ ہوں۔“ راوی کہتے ہیں: پھر رسول اللہ ﷺ نے ہمیں حکم دیا، تو ایک شخص نے ایک ٹانگ پکڑی، دوسرے نے دوسری ٹانگ، تیسرے نے ایک ہاتھ، چوتھے نے دوسرا ہاتھ، پانچویں نے ایک سینگ اور چھٹے نے دوسرا سینگ پکڑا، جبکہ ساتویں شخص نے اسے ذبح کیا اور ان سب نے مل کر اس پر تکبیر کہی۔

سیدنا معاویہ بن قرہ اپنے والد رضی اللہ عنہ سے روایت کرتے ہیں کہ ایک شخص نے عرض کیا: اے اللہ کے رسول ﷺ! میں جب بکری ذبح کرنے لگتا ہوں تو مجھے اس پر ترس آتا ہے، تو رسول اللہ ﷺ نے فرمایا: ”اگر تم اس پر رحم کرو گے تو اللہ تعالیٰ تم پر رحم فرمائے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔