المستدرك على الصحيحين

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جس کی تین بیٹیاں ہوں اور وہ ان کی سختی و نرمی (تنگی و آسانی) پر صبر کرے، تو اللہ تعالیٰ ان (بیٹیوں) پر اپنی رحمت کی وجہ سے اسے جنت میں داخل فرمائے گا۔“ ایک شخص نے عرض کیا: اے اللہ کے رسول! اور اگر دو ہوں؟ آپ ﷺ نے فرمایا: ”اور دو (بیٹیوں پر بھی)۔“ پھر ایک شخص نے عرض کیا: اے اللہ کے رسول! اور اگر ایک ہو؟ آپ ﷺ نے فرمایا: ”اور ایک (پر بھی)۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا انس رضی اللہ عنہ سے روایت ہے کہ نبی کریم ﷺ اپنے صحابہ کی ایک جماعت کے پاس سے گزرے، وہاں راستے میں ایک بچہ تھا، جب اس کی ماں نے جانوروں (کے غول) کو دیکھا تو اسے اپنے بیٹے کے پاؤں تلے کچلے جانے کا خوف ہوا، وہ دیوانہ وار گھبرا کر دوڑی اور پکارنے لگی: ہائے میرا بچہ، ہائے میرا بچہ! پھر اس نے اپنے بیٹے کو اٹھا لیا، لوگوں نے عرض کیا: اے اللہ کے نبی! یہ ماں ایسی نہیں ہے کہ اپنے بچے کو آگ میں پھینک دے، تو رسول اللہ ﷺ نے فرمایا: ”نہیں اللہ کی قسم! اللہ بھی اپنے محبوب کو آگ میں نہیں پھینکے گا۔“ راوی کہتے ہیں: پس اللہ کے نبی ﷺ نے (ان کی بات سے اپنی بات ثابت کر کے) ان پر دلیل قائم کر دی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا ابن عباس رضی اللہ عنہما سے روایت ہے کہ رسول اللہ ﷺ نے فرمایا: ”جس کے ہاں بیٹی پیدا ہو اور وہ اسے (زمانہ جاہلیت کی طرح) زندہ درگور نہ کرے، نہ اسے ذلیل سمجھے اور نہ ہی اپنے بیٹے کو اس پر ترجیح دے، تو اللہ تعالیٰ اس کی وجہ سے اسے جنت میں داخل فرمائے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا انس بن مالک رضی اللہ عنہ سے روایت ہے کہ ایک عورت سیدہ عائشہ رضی اللہ عنہا کے پاس کچھ مانگنے آئی اور اس کے ساتھ اس کے دو بچے تھے۔ سیدہ عائشہ رضی اللہ عنہا نے اسے تین کھجوریں عطا کیں، اس عورت نے دونوں بچوں کو ایک ایک کھجور دے دی اور ایک کھجور اپنے (کھانے کے) لیے رکھ لی۔ ان دونوں بچوں نے اپنی کھجوریں کھا لیں، پھر اس عورت نے اپنی کھجور پکڑی اور اسے دو حصوں میں تقسیم کر دیا اور اپنے دونوں بچوں کو آدھی آدھی کھجور دے دی۔ جب نبی کریم ﷺ تشریف لائے تو سیدہ عائشہ رضی اللہ عنہا نے آپ ﷺ کو اس واقعے کی خبر دی، تو آپ ﷺ نے فرمایا: ”تمہیں اس کی اس بات پر کیا تعجب ہے؟ یقیناً اللہ تعالیٰ نے اس کے اپنے بچوں پر رحم کرنے کی وجہ سے اس پر رحم فرمایا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔