المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ کے پاس حضرت جبرائیل علیہ السلام آئے اور عرض کیا: ”اے محمد (ﷺ)! بے شک اللہ تعالیٰ نے شراب پر، اسے نچوڑنے والے پر، نچوڑوانے والے پر، اسے اٹھا کر لے جانے والے پر، جس کی طرف وہ لے جائی جائے اس پر، اسے پینے والے پر، اسے بیچنے والے پر، اسے خریدنے والے پر، اسے پلانے والے پر اور جسے پلائی جائے اس پر لعنت فرمائی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا: ”جس نے دنیا میں شراب پی، وہ آخرت میں اس سے محروم رہے گا۔“
یہ شعبہ کی روایت سے ایک صحیح اور غریب حدیث ہے، اور شیخین نے اس باب میں نافع سے مروی عبید اللہ بن عمر اور ابن جریج کی حدیث پر اتفاق کیا ہے۔