المستدرك على الصحيحين

سیدنا عبداللہ بن عباس رضی اللہ عنہما سے روایت ہے، انہوں نے کہا: جب شراب کی تحریم کا حکم نازل ہوا تو لوگوں نے عرض کیا: یا رسول اللہ! ہمارے ان بھائیوں کا کیا بنے گا جو اس حال میں فوت ہو گئے کہ وہ شراب پیتے تھے؟ راوی کہتے ہیں: تو یہ آیت نازل ہوئی: ﴿لَيْسَ عَلَى الَّذِينَ آمَنُوا وَعَمِلُوا الصَّالِحَاتِ جُنَاحٌ فِيمَا طَعِمُوا﴾ ”جو لوگ ایمان لائے اور نیک عمل کیے ان پر اس چیز کا کوئی گناہ نہیں جو انہوں نے (حکم آنے سے پہلے) کھایا پیا۔“ [سورة المائدة: 93]
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن مسعود رضی اللہ عنہ سے روایت ہے کہ جب شراب کی تحریم کا حکم نازل ہوا تو یہودیوں نے کہا: کیا آپ کے وہ بھائی جو فوت ہو گئے وہ اسے نہیں پیتے تھے؟! تو اللہ عزوجل نے یہ آیت نازل فرمائی: ﴿لَيْسَ عَلَى الَّذِينَ آمَنُوا وَعَمِلُوا الصَّالِحَاتِ جُنَاحٌ فِيمَا طَعِمُوا﴾ ”جو لوگ ایمان لائے اور نیک عمل کیے، ان پر اس چیز کا کوئی گناہ نہیں جو انہوں نے (حکم آنے سے پہلے) کھایا پیا۔“ [سورة المائدة: 93] تو نبی کریم ﷺ نے فرمایا: ”مجھے کہا گیا ہے کہ: ”آپ بھی انہی میں سے ہیں۔“
یہ حدیث صحیح الاسناد ہے لیکن شیخین نے اسے (ان الفاظ کے ساتھ) روایت نہیں کیا، انہوں نے صرف شعبہ کی روایت سے حضرت براء رضی اللہ عنہ کی ایک مختصر حدیث پر اس مفہوم میں اتفاق کیا ہے۔