المستدرك على الصحيحين

سیدنا انس بن مالک رضی اللہ عنہ سے روایت ہے کہ بقیع میں ایک خرگوش بھاگا تو میں بھی ان لوگوں میں شامل تھا جو اسے پکڑنے کے لیے پیچھے دوڑے، میں سب سے آگے نکل گیا اور اسے پکڑ لیا، پھر میں اسے سیدنا ابو طلحہ رضی اللہ عنہ کے پاس لایا تو انہوں نے اسے ذبح کر کے بھوننے کا حکم دیا، پھر انہوں نے خرگوش کا پچھلا حصہ (ران) مجھے دے کر نبی کریم ﷺ کی طرف بھیجا، آپ ﷺ نے دریافت فرمایا: ”یہ کیا ہے؟“ میں نے عرض کی: یہ خرگوش کی ران ہے جو ابو طلحہ نے آپ کے لیے بھیجی ہے، تو آپ ﷺ نے اسے قبول فرما لیا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابو رافع رضی اللہ عنہ سے روایت ہے کہ میں رسول اللہ ﷺ کے لیے بکری کا پیٹ (یا اوجھڑی کا گوشت) بھونا کرتا تھا، آپ ﷺ اس میں سے تناول فرماتے اور پھر (دوبارہ وضو کیے بغیر) نماز کے لیے تشریف لے جاتے۔

سیدنا ابو رافع رضی اللہ عنہ سے روایت ہے کہ میں رسول اللہ ﷺ کے لیے بکری کے پیٹ (کا گوشت) بھونا کرتا تھا جبکہ آپ ﷺ نے نماز کے لیے وضو فرما رکھا ہوتا تھا، آپ ﷺ اسے تناول فرماتے اور پھر (دوبارہ وضو کیے بغیر) نماز کے لیے تشریف لے جاتے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا صفوان بن امیہ رضی اللہ عنہ سے روایت ہے کہ رسول اللہ ﷺ نے مجھے اس حال میں دیکھا کہ میں گوشت کو ہڈی سے اپنے ہاتھ کے ذریعے (نوچ کر) علیحدہ کر رہا تھا، تو آپ ﷺ نے مجھ سے فرمایا: ”اے صفوان!“ میں نے عرض کی: میں حاضر ہوں، آپ ﷺ نے فرمایا: ”گوشت کو اپنے منہ کے قریب لے جاؤ (اور دانتوں سے کاٹ کر کھاؤ)، کیونکہ یہ زیادہ لذیذ، خوشگوار اور جلد ہضم ہونے والا طریقہ ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔