المستدرك على الصحيحين

سیدنا مصعب بن عبداللہ زبیری رضی اللہ عنہ سے مروی ہے کہ سیدہ ام قیس بنت محصن رضی اللہ عنہا سیدنا عکاشہ بن محصن کی بہن ہیں، وہ مکہ میں قدیم الاسلام تھیں اور اپنے گھر والوں کے ساتھ مدینہ ہجرت کی، وہ رسول اللہ ﷺ کے بعد عرصہ دراز تک حیات رہیں اور آپ ﷺ سے روایات نقل کیں۔

سیدہ ام قیس رضی اللہ عنہا سے روایت ہے کہ رسول اللہ ﷺ ان کا ہاتھ تھامے ہوئے مدینہ کی ایک گلی سے گزر کر بقیع الغرقد تشریف لائے اور فرمایا: ”اے ام قیس!“ میں نے عرض کیا: میں حاضر ہوں اور آپ ﷺ کی فرماں برداری کے لیے تیار ہوں یا رسول اللہ، آپ ﷺ نے فرمایا: ”کیا تم یہ قبرستان دیکھ رہی ہو؟“ میں نے عرض کیا: جی ہاں یا رسول اللہ، آپ ﷺ نے فرمایا: ”اللہ تعالیٰ قیامت کے دن یہاں سے ستر ہزار ایسے لوگوں کو اٹھائے گا جن کے چہرے چودھویں کے چاند کی طرح روشن ہوں گے اور وہ بغیر حساب کے جنت میں داخل ہوں گے۔“ تب سیدنا عکاشہ رضی اللہ عنہ کھڑے ہوئے اور عرض کیا: اور میں بھی یا رسول اللہ؟ آپ ﷺ نے فرمایا: ”تم بھی“، پھر ایک اور صاحب کھڑے ہوئے اور وہی سوال کیا تو آپ ﷺ نے فرمایا: ”عکاشہ تم سے سبقت لے گئے۔“