المستدرك على الصحيحين

یزید بن اصم سیدہ میمونہ رضی اللہ عنہا سے روایت کرتے ہیں کہ رسول اللہ ﷺ نے ان سے اس حال میں نکاح فرمایا کہ آپ ﷺ احرام میں نہیں تھے اور جب سرف کے مقام پر رخصتی ہوئی تب بھی آپ ﷺ حلال تھے، اور ان کی وفات بھی مقامِ سرف پر اسی رات میں ہوئی جس رات برسوں پہلے آپ ﷺ نے ان سے پہلی شب گزاری تھی، وہ میمونہ رضی اللہ عنہا میری خالہ تھیں، میں اور ابن عباس رضی اللہ عنہما ان کی قبر میں اترے، جب ہم نے انہیں لحد میں رکھا تو ان کا سر ایک طرف ڈھلک گیا، میں نے اپنی چادر تہہ کر کے ان کے سر کے نیچے رکھنا چاہی تو ابن عباس رضی اللہ عنہما نے اسے لے کر پھینک دیا اور ان کے سر کے نیچے ایک پتھر «كذانه» رکھ دیا اور فرمایا: انہوں نے حج کے موقع پر سر منڈوایا تھا اس لیے ان کا سر چھوٹے بالوں والا تھا، مقامِ سرف اور مکہ کے درمیان بارہ میل کا فاصلہ ہے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، اور یہ صحیح سند اس بات کی گواہی دیتی ہے کہ رسول اللہ ﷺ نے ان سے حالتِ حلال میں نکاح فرمایا تھا، جہاں تک ابن عباس سے عکرمہ کی روایات کا تعلق ہے وہ کہتی ہیں کہ آپ ﷺ نے حالتِ احرام میں نکاح فرمایا تھا۔

ابوالشعثاء سیدنا ابن عباس رضی اللہ عنہما سے روایت کرتے ہیں کہ نبی کریم ﷺ نے (سیدہ میمونہ رضی اللہ عنہا سے) نکاح فرمایا جب کہ آپ ﷺ حالتِ احرام میں تھے۔ عمرو بن دینار کہتے ہیں: میں نے اس کا ذکر امام زہری سے کیا تو انہوں نے پوچھا: اے عمرو! تم کیا سمجھتے ہو وہ کون خاتون تھیں؟ میں نے کہا: لوگ کہتے ہیں کہ وہ سیدہ میمونہ رضی اللہ عنہا تھیں۔ ابن شہاب زہری نے کہا: مجھے یزید بن اصم نے بتایا کہ نبی کریم ﷺ نے ان سے اس حال میں نکاح فرمایا کہ آپ ﷺ حلال (احرام کے بغیر) تھے۔ عمرو نے ابن شہاب زہری سے کہا: کیا تم ایک دیہاتی شخص کو، جو اپنی ایڑیوں پر پیشاب کر لیتا ہو، ابن عباس جیسے (عظیم فقیہ) کے برابر قرار دیتے ہو؟ ابن شہاب زہری نے جواب دیا: وہ (میمونہ) ان کی (یزید بن اصم کی) خالہ تھیں، تو عمرو نے کہا: وہ ابن عباس کی بھی تو خالہ تھیں۔
یہ حدیث شیخین کی شرط پر صحیح ہے۔