المستدرك على الصحيحين

ابن شہاب زہری سے روایت ہے کہ رسول اللہ ﷺ صلح حدیبیہ کے اگلے سال سنہ 7 ہجری میں ذوالقعدہ کے مہینے میں عمرہ ادا کرنے کے لیے نکلے، یہ وہی مہینہ تھا جس میں مشرکین نے آپ ﷺ کو مسجد حرام سے روک دیا تھا، جب آپ ﷺ مقامِ یاجج پہنچے تو آپ ﷺ نے سیدنا جعفر بن ابی طالب رضی اللہ عنہ کو سیدہ میمونہ بنت حارث کی طرف نکاح کا پیغام دے کر بھیجا، انہوں نے اپنا معاملہ سیدنا عباس بن عبدالمطلب رضی اللہ عنہ کے سپرد کر دیا جبکہ ان کی بہن ام الفضل سیدنا عباس کے نکاح میں تھیں، چنانچہ سیدنا عباس رضی اللہ عنہ نے رسول اللہ ﷺ سے ان کا نکاح پڑھا دیا، نبی کریم ﷺ مقامِ سرف پر ٹھہرے رہے یہاں تک کہ سیدہ میمونہ تشریف لائیں اور آپ ﷺ نے سرف ہی کے مقام پر ان کی رخصتی فرمائی، اور اللہ تعالیٰ کی تقدیر دیکھیں کہ ایک طویل عرصے کے بعد سیدہ میمونہ کی وفات بھی مقامِ سرف ہی پر ہوئی، گویا ان کی وفات اسی مقام پر ہوئی جہاں رسول اللہ ﷺ نے ان کے ساتھ پہلی شب گزاری تھی۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے سیدہ میمونہ بنت حارث سے نکاح فرمایا اور مکہ میں تین دن قیام کیا، تیسرے دن حویطب بن عبدالعزیٰ قریش کے چند افراد کے ساتھ حاضر ہوئے اور کہنے لگے: ”آپ کی مہلت ختم ہو گئی ہے لہٰذا اب ہمارے شہر سے نکل جائیے“، آپ ﷺ نے فرمایا: ”تمہارا کیا حرج ہے اگر تم مجھے یہاں رہنے دو تاکہ میں تمہارے درمیان ہی رخصتی کی تقریب کروں اور تمہارے لیے کھانا تیار کروں جس میں تم بھی شریک ہو؟“ انہوں نے کہا: ”ہمیں آپ کے کھانے کی کوئی ضرورت نہیں، آپ یہاں سے نکل جائیے“، چنانچہ آپ ﷺ سیدہ میمونہ رضی اللہ عنہا کو لے کر نکلے یہاں تک کہ مقامِ سرف پر ان کی رخصتی فرمائی۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا، اور اللہ کی قضا و قدر سے یہ بات تعجب خیز ہے کہ رسول اللہ ﷺ نے سیدہ میمونہ رضی اللہ عنہا کے ساتھ مقامِ سرف پر خلوت فرمائی اور عمرہ قضا سے واپسی پر انہیں مدینہ لے گئے، وہ آپ ﷺ کے نکاح میں رہیں یہاں تک کہ آپ ﷺ فتح مکہ کے لیے نکلے، آپ ﷺ انہیں ساتھ لے کر گئے یہاں تک کہ طائف فتح ہوا اور آپ مدینہ واپس آئے، پھر بعد میں سیدہ میمونہ کی وفات اسی مقامِ سرف پر ہوئی جہاں نکاح کے وقت رسول اللہ ﷺ نے ان سے پہلی شب گزاری تھی۔