المستدرك على الصحيحين

عمر بن عثمان جحشی اپنے والد سے روایت کرتے ہیں، انہوں نے کہا: سیدہ زینب بنت جحش رضی اللہ عنہا نے اپنے پیچھے کوئی دینار یا درہم نہیں چھوڑا، وہ جو کچھ بھی پاتیں اسے صدقہ کر دیتیں، وہ مسکینوں کی جائے پناہ تھیں، انہوں نے اپنا مکان چھوڑا جسے ان کے ورثاء نے ولید بن عبدالملک کے ہاتھ اس وقت پچاس ہزار درہم میں فروخت کیا جب مسجد (نبوی) کی توسیع کی جا رہی تھی۔

عمر بن عثمان جحشی سے روایت ہے، وہ ابراہیم بن عبداللہ بن محمد جحشی سے اور وہ اپنے والد سے روایت کرتے ہیں کہ سیدنا عکاشہ بن محصن رضی اللہ عنہ کی والدہ سے پوچھا گیا: سیدہ زینب بنت جحش رضی اللہ عنہا کی وفات کے وقت عمر کتنی تھی؟ انہوں نے بتایا: ”جب ہم ہجرت کر کے مدینہ آئے تو ان کی عمر تیس سال سے کچھ اوپر تھی، اور ان کی وفات بیس ہجری میں ہوئی“۔ عمر بن عثمان کہتے ہیں کہ میرے والد فرمایا کرتے تھے: ”سیدہ زینب بنت جحش رضی اللہ عنہا کی جب وفات ہوئی تو وہ ترپن (53) سال کی تھیں۔“