المستدرك على الصحيحين

مصعب بن عبداللہ زبیری سے روایت ہے کہ: ضرار بن ازور —اور ازور کا نام مالک تھا— بن اوس بن جذیمہ بن ربیعہ بن مالک بن ثعلبہ بن دودان بن اسد بن خزیمہ بن مدرکہ بن الیاس بن مضر، وہ کوفہ میں مقیم ہوئے اور وہیں ان کی وفات ہوئی۔

سیدنا ضرار بن ازور رضی اللہ عنہ سے روایت ہے کہ میں نے عرض کی: (یا رسول اللہ!) اپنا ہاتھ بڑھائیے تاکہ میں اسلام پر آپ کی بیعت کروں، چنانچہ میں نے بیعت کی، پھر میں نے یہ اشعار کہے: ”میں نے جوئے کے تیروں، گا بجا کر تفریح فراہم کرنے والیوں اور شراب کو اللہ کی بندگی اور گڑگڑا کر دعا کرنے کے لیے چھوڑ دیا ہے، اور اب دشمن کی صفوں میں بہادری سے گھسنا اور مسلمانوں کی طرف سے قتال کرنا میرا مشغلہ ہے، پس اے میرے رب! میری اس بیعت میں مجھے نقصان نہ ہونے پائے جبکہ میں نے اپنا گھر بار اور مال و متاع بدل کر (آخرت) خرید لی ہے“، تو نبی کریم ﷺ نے ارشاد فرمایا: ”اے ضرار! تمہاری یہ بیعت خسارے والی نہیں ہے۔“

سیدنا ضرار بن ازور رضی اللہ عنہ سے روایت ہے کہ رسول اللہ ﷺ میرے پاس سے گزرے جبکہ میں (جانور کا) دودھ دوہ رہا تھا، آپ ﷺ نے فرمایا: ”دودھ کی پکار (بچے کا حصہ) باقی چھوڑ دو۔“