المستدرك على الصحيحين

سیدنا زید بن ثابت رضی اللہ عنہ سے روایت ہے، انہوں نے کہا: جنگِ بعاث کے وقت میری عمر چھ برس تھی اور یہ واقعہ رسول اللہ ﷺ کی ہجرت سے پانچ سال پہلے کا ہے، پھر جب رسول اللہ ﷺ مدینہ تشریف لائے تو میں گیارہ سال کا تھا، مجھے آپ ﷺ کی خدمت میں لایا گیا اور لوگوں نے عرض کی: یہ قبیلہ خزرج کا ایک لڑکا ہے جس نے قرآن کی سولہ سورتیں پڑھ لی ہیں، مجھے غزوہ بدر اور احد میں (عمر کم ہونے کی بنا پر) شرکت کی اجازت نہیں ملی، تاہم غزوہ خندق میں شرکت کی اجازت دے دی گئی۔

ابن عمر سے روایت ہے کہ سیدنا زید بن ثابت رضی اللہ عنہ عربی اور عبرانی دونوں تحریریں لکھ لیا کرتے تھے، اور پہلا غزوہ جس میں انہوں نے رسول اللہ ﷺ کے ساتھ شرکت کی وہ غزوہ خندق تھا جبکہ ان کی عمر پندرہ سال تھی، وہ اس دن مسلمانوں کے ساتھ مٹی اٹھا رہے تھے تو رسول اللہ ﷺ نے فرمایا: ”یہ کتنا ہی اچھا لڑکا ہے۔“ اس دن ان کی آنکھ لگ گئی اور وہ سو گئے تو عمارہ بن حزم آئے اور ان کا اسلحہ اٹھا لیا جبکہ انہیں خبر نہ ہوئی، رسول اللہ ﷺ نے ان سے فرمایا: ”اے بہت سونے والے (ابو رقاد)! تم سوئے رہے یہاں تک کہ تمہارا اسلحہ چلا گیا“، پھر آپ ﷺ نے پوچھا: ”اس لڑکے کے اسلحہ کے بارے میں کسی کو علم ہے؟“ عمارہ بن حزم نے عرض کی: یا رسول اللہ! وہ میرے پاس ہے، پھر انہوں نے وہ واپس کر دیا، تب رسول اللہ ﷺ نے کسی مومن کو ڈرانے اور مذاق یا سنجیدگی میں اس کا سامان لینے سے منع فرمایا۔ غزوہ تبوک میں بنو مالک بن نجار کا جھنڈا عمارہ بن حزم کے پاس تھا لیکن رسول اللہ ﷺ نے ان سے لے کر زید بن ثابت کو دے دیا، عمارہ نے عرض کی: یا رسول اللہ! کیا آپ کو میری کوئی شکایت ملی ہے؟ آپ ﷺ نے فرمایا: ”نہیں، لیکن قرآن کو مقدم رکھا جائے گا اور زید نے تم سے زیادہ قرآن حاصل کیا ہے۔“

ابن عمر رضی اللہ عنہما سے روایت ہے کہ سیدنا زید بن ثابت رضی اللہ عنہ کا جب انتقال ہوا تو ان کے بیٹے اسماعیل چھوٹے تھے اور انہوں نے اپنے والد سے کچھ نہیں سنا۔ ان کی وفات کے وقت میں اختلاف ہے، ہمارے نزدیک وہ مدینہ منورہ میں سن 45 ہجری میں فوت ہوئے جبکہ ان کی عمر چھپن سال تھی اور مروان بن حکم نے ان کی نمازِ جنازہ پڑھائی۔

علی بن مدینی سے روایت ہے کہ سیدنا زید بن ثابت رضی اللہ عنہ کی وفات سن 44 یا 45 ہجری میں ہوئی۔