المستدرك على الصحيحين

محمد بن عمر سے روایت ہے کہ سیدنا عبداللہ بن سلام رضی اللہ عنہ کی کنیت ”ابو یوسف“ تھی، اور اسلام قبول کرنے سے پہلے ان کا نام «الحُصَيْن» ”الحصین“ تھا، جب وہ اسلام لائے تو رسول اللہ ﷺ نے ان کا نام عبداللہ رکھا، آپ کا تعلق بنی اسرائیل سے تھا اور آپ سیدنا یوسف بن یعقوب علیہما السلام کی اولاد میں سے تھے، نیز آپ بنو خزرج کی شاخ بنو عوف کے قبیلے ”قواقلہ“ «القواقِلَةِ» کے حلیف تھے، تمام مورخین کے اقوال کے مطابق سیدنا عبداللہ بن سلام رضی اللہ عنہ کی وفات سن 43 ہجری میں حضرت معاویہ رضی اللہ عنہ کے عہدِ حکومت میں مدینہ منورہ میں ہوئی۔

یحییٰ بن سعید سے روایت ہے کہ سیدنا عبداللہ بن سلام رضی اللہ عنہ کی نسبتِ ولاء رسول اللہ ﷺ کی جانب تھی، اور ان کا انتقال سن 43 ہجری میں ہوا۔ شیخین (امام بخاری و مسلم) کا سیدنا سعد بن ابی وقاص رضی اللہ عنہ کی اس حدیث پر اتفاق ہے کہ نبی کریم ﷺ نے روئے زمین پر چلنے والے کسی بھی شخص کے متعلق یہ نہیں فرمایا کہ ”وہ جنتی ہے“ سوائے سیدنا عبداللہ بن سلام رضی اللہ عنہ کے۔

ضحاک سے اللہ تعالیٰ کے اس فرمان ﴿وَشَهِدَ شَاهِدٌ مِنْ بَنِي إِسْرَائِيلَ عَلَى مِثْلِهِ﴾ [سورة الأحقاف: 10] کے متعلق روایت ہے، انہوں نے کہا: اس آیت میں گواہی دینے والے شاہد سے مراد سیدنا عبداللہ بن سلام رضی اللہ عنہ ہیں، اور وہ بنی اسرائیل کے جید علماء اور احبار میں سے تھے۔