المستدرك على الصحيحين

ابن اسحاق نے بنو جشم بن حارث اور زید بن حارث (یہ دونوں جڑواں بھائی تھے) میں سے غزوۂ بدر اور بیعتِ عقبہ میں شریک ہونے والوں کے نام گنواتے ہوئے بیان کیا کہ ان میں عبداللہ بن زید بن عبد ربہ بن ثعلبہ رضی اللہ عنہ بھی شامل تھے، یہ وہی ہیں جنہیں خواب میں نماز کی اذان دکھائی گئی تھی، پھر وہ اسے لے کر رسول اللہ ﷺ کے پاس آئے تو آپ ﷺ نے اس (اذان) کا حکم جاری فرما دیا۔

یحییٰ بن بکیر بیان کرتے ہیں کہ عبداللہ بن زید رضی اللہ عنہ، جو اذان (کا خواب دیکھنے) والے صحابی ہیں، ان کی کنیت ابو محمد تھی۔

عروہ سے بنو جشم بن حارث اور زید بن حارث (جو کہ دونوں جڑواں بھائی تھے) میں سے غزوۂ بدر اور بیعتِ عقبہ میں شریک ہونے والوں کے بارے میں مروی ہے کہ ان میں عبداللہ بن زید بن عبد ربہ بن ثعلبہ بن زید بن حارث بن خزرج اور ان کے بھائی حریث بن زید رضی اللہ عنہم شامل تھے۔ اور عبداللہ بن زید رضی اللہ عنہ وہی ہیں جنہیں خواب میں نماز کی اذان دکھائی گئی تھی۔