المستدرك على الصحيحين

سیدنا سہل بن سعد رضی اللہ عنہ سے روایت ہے، انہوں نے کہا: رسول اللہ ﷺ سخت گرمی کے موسم میں (سفر پر) نکلے اور ایک مقام پر پڑاؤ ڈالا۔ پھر رسول اللہ ﷺ غسل کرنے کے لیے کھڑے ہوئے، تو سیدنا عباس بن عبدالمطلب رضی اللہ عنہ نے اونی چادر سے آپ ﷺ کا پردہ کیا۔ سہل فرماتے ہیں کہ میں نے چادر کی ایک جانب سے رسول اللہ ﷺ کی طرف دیکھا، آپ ﷺ نے اپنا سر مبارک آسمان کی طرف اٹھایا ہوا تھا اور یہ دعا فرما رہے تھے: «اللَّهُمَّ اسْتُرِ الْعَبَّاسَ وَوَلَدَهُ مِنَ النَّارِ» ”اے اللہ! عباس اور ان کی اولاد کو آگ (جہنم) سے محفوظ رکھ۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن حارثہ رضی اللہ عنہ سے روایت ہے، انہوں نے کہا: جب صفوان بن امیہ بن خلف جمحی آئے تو رسول اللہ ﷺ نے ان سے دریافت فرمایا: ”اے ابو وہب! تم کس کے ہاں ٹھہرے ہو؟“ انہوں نے عرض کیا: عباس (رضی اللہ عنہ) کے ہاں۔ آپ ﷺ نے فرمایا: ”تم قریش میں سے اس شخص کے ہاں ٹھہرے ہو جو قریش سے سب سے زیادہ محبت کرنے والا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔