المستدرك على الصحيحين

عروہ سے روایت ہے کہ رسول اللہ ﷺ جب غزوہ حنین کے لیے نکلے تو آپ ﷺ نے سیدنا معاذ بن جبل رضی اللہ عنہ کو اہل مکہ پر اپنا خلیفہ مقرر فرمایا، اور رسول اللہ ﷺ نے انہیں حکم دیا کہ وہ لوگوں کو قرآن سکھائیں اور انہیں دین کی سمجھ بوجھ عطا کریں، پھر رسول اللہ ﷺ اسی سال مدینہ واپس تشریف لائے اور معاذ بن جبل رضی اللہ عنہ کو اہل مکہ کی تعلیم کے لیے وہیں پیچھے رہنے دیا۔

سیدنا عبداللہ بن عمر رضی اللہ عنہما سے روایت ہے کہ سیدنا عمر رضی اللہ عنہ، معاذ بن جبل رضی اللہ عنہ کے پاس سے گزرے تو وہ رو رہے تھے، انہوں نے پوچھا: ”آپ کیوں رو رہے ہیں؟“ انہوں نے کہا: ایک حدیث کی وجہ سے جو میں نے رسول اللہ ﷺ سے سنی تھی: ”بیشک ادنیٰ درجہ کی ریاکاری بھی شرک ہے، اور اللہ عزوجل کے نزدیک سب سے محبوب وہ بندے ہیں جو متقی اور گمنام رہنے والے ہیں، کہ جب وہ غائب ہوں تو انہیں تلاش نہ کیا جائے اور جب وہ موجود ہوں تو انہیں پہچانا نہ جائے، وہی لوگ ہدایت کے امام اور علم کے چراغ ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔