المستدرك على الصحيحين

محمد بن سیرین سے روایت ہے کہ سیدنا سعد بن عبادہ رضی اللہ عنہ ایک قوم کی کوڑی (کوڑا کرکٹ پھینکنے کی جگہ) پر آئے اور وہاں کھڑے ہو کر پیشاب کیا، پھر وہ اچانک مردہ ہو کر گر پڑے، تب جنات نے یہ (اشعار) کہے: ”ہم نے قبیلہ خزرج کے سردار سعد بن عبادہ کو قتل کر دیا اور ہم نے انہیں دو ایسے تیر مارے جنہوں نے ان کے دل کا نشانہ خطا نہیں کیا۔“

قتادہ سے روایت ہے کہ سیدنا سعد بن عبادہ رضی اللہ عنہ نے پیشاب کیا، پھر جب وہ واپس آئے تو کہنے لگے: ”میں اپنی کمر میں کچھ (تکلیف) محسوس کر رہا ہوں“، پھر وہ زیادہ دیر نہ گزری تھی کہ فوت ہو گئے، تو جنات نے نوحہ کرتے ہوئے کہا: ”ہم نے قبیلہ خزرج کے سردار سعد بن عبادہ کو قتل کر دیا اور ہم نے انہیں دو ایسے تیر مارے جنہوں نے ان کے دل کا نشانہ خطا نہیں کیا۔“

سیدنا انس رضی اللہ عنہ سے روایت ہے کہ جب رسول اللہ ﷺ کو ابوسفیان کے (تجارتی قافلے کی) آمد کی خبر پہنچی تو سیدنا ابوبکر رضی اللہ عنہ نے کلام کیا لیکن آپ ﷺ نے ان سے اعراض فرمایا، پھر سیدنا عمر رضی اللہ عنہ نے کلام کیا تو آپ ﷺ نے ان سے بھی اعراض فرمایا، تب سیدنا سعد بن عبادہ رضی اللہ عنہ نے عرض کیا: ”یا رسول اللہ! اس ذات کی قسم جس کے قبضہ قدرت میں میری جان ہے، اگر آپ ہمیں سمندر میں کود جانے کا حکم دیں گے تو ہم اس میں کود جائیں گے، اور اگر آپ ہمیں حکم دیں کہ ہم سواریوں کے سینوں کو مارتے ہوئے (تیزی کے ساتھ) ”برک الغماد“ (انتہائی دور دراز مقام) تک لے جائیں تو ہم ضرور ایسا کریں گے“، چنانچہ رسول اللہ ﷺ نے لوگوں کو (تیاری کے لیے) پکارا اور وہ سب روانہ ہوئے یہاں تک کہ بدر کے مقام پر پڑاؤ کیا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔