المستدرك على الصحيحين

سیدنا اسامہ بن زید اپنے والد سے روایت کرتے ہیں کہ جب رسول اللہ ﷺ غزوہ بدر سے فارغ ہوئے تو آپ ﷺ نے اہل مدینہ کی طرف دو خوشخبری سنانے والے بھیجے: زید بن حارثہ رضی اللہ عنہ کو نشیبی علاقے (سافلہ) والوں کی طرف اور عبداللہ بن رواحہ رضی اللہ عنہ کو بالائی علاقے (عالیہ) والوں کی طرف روانہ کیا تاکہ وہ لوگوں کو اللہ کی طرف سے اپنے نبی ﷺ کو عطا کردہ فتح کی خوشخبری سنائیں، پس زید بن حارثہ رضی اللہ عنہ اس وقت پہنچے جب ان کے بیٹے اسامہ رسول اللہ ﷺ کی صاحبزادی سیدہ رقیہ رضی اللہ عنہا کی قبر پر مٹی برابر کر چکے تھے، اسامہ سے کہا گیا کہ وہ دیکھو تمہارے والد آگئے ہیں، اسامہ کہتے ہیں کہ میں آیا تو وہ لوگوں کے سامنے کھڑے (فتح کا اعلان کرتے ہوئے) کہہ رہے تھے: ”عتبہ بن ربیعہ، شیبہ بن ربیعہ، ابوجہل بن هشام، نبہیہ، منبہ اور امیہ بن خلف قتل کر دیے گئے ہیں،“ میں نے پوچھا: ”اے ابا جان! کیا یہ سچ ہے؟“ انہوں نے کہا: ”ہاں اللہ کی قسم اے میرے پیارے بیٹے!“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

زید بن حارثہ کے بھائی جبلہ بن حارثہ رضی اللہ عنہ سے روایت ہے کہ رسول اللہ ﷺ جب جنگ کے لیے تشریف نہ لے جاتے تو اپنا اسلحہ صرف سیدنا علی یا سیدنا زید بن حارثہ رضی اللہ عنہما کو ہی (بطورِ حفاظت یا اعزاز) عطا فرماتے تھے۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔

سیدنا سلمہ بن اکوع رضی اللہ عنہ سے روایت ہے، انہوں نے کہا: میں نے رسول اللہ ﷺ کے ہمراہ سات غزوات میں شرکت کی، اور زید بن حارثہ رضی اللہ عنہ کی معیت میں نو غزوات لڑے جن میں رسول اللہ ﷺ نے انہیں ہمارا امیر مقرر فرمایا تھا۔
یہ حدیث شیخین کی شرط پر صحیح ہے۔

سیدہ عائشہ رضی اللہ عنہا سے روایت ہے کہ نبی کریم ﷺ نے زید بن حارثہ رضی اللہ عنہ کو جس لشکر میں بھی روانہ فرمایا انہیں ان سب پر امیر ہی مقرر فرمایا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔