المستدرك على الصحيحين

سیدنا انس بن مالک رضی اللہ عنہ سے روایت ہے کہ رسول اللہ ﷺ مسلسل چھ ماہ تک جب نماز فجر کے لیے نکلتے تو سیدہ فاطمہ رضی اللہ عنہا کے دروازے کے پاس سے گزرتے ہوئے فرماتے: ”اے اہل بیت! نماز (کا وقت ہے) ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ [سورة الأحزاب: 33] ”اللہ تو یہی چاہتا ہے کہ اے نبی کے گھر والو! تم سے ناپاکی دور کر دے اور تمہیں پوری طرح پاک کر دے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سوید بن غفلہ سے روایت ہے کہ سیدنا علی رضی اللہ عنہ نے ابوجہل کی بیٹی کا رشتہ اس کے چچا حارث بن ہشام سے مانگا، تو انہوں نے نبی کریم ﷺ سے مشورہ کیا، آپ ﷺ نے فرمایا: ”کیا تم مجھ سے اس کے حسب و نسب کے بارے میں پوچھ رہے ہو؟“ سیدنا علی رضی اللہ عنہ نے عرض کیا: میں اس کا حسب تو جانتا ہوں، لیکن کیا آپ مجھے اس نکاح کا حکم دیتے ہیں؟ آپ ﷺ نے فرمایا: ”نہیں، فاطمہ (رضی اللہ عنہا) میرا ایک ٹکڑا ہے اور میرا یہی خیال ہے کہ وہ غمگین یا بے چین ہو جائے گی“، تو سیدنا علی رضی اللہ عنہ نے عرض کیا: میں ایسا کوئی کام نہیں کروں گا جو انہیں ناپسند ہو۔
یہ حدیث شیخین کی شرط پر صحیح ہے لیکن انہوں نے اسے اس سیاق کے ساتھ روایت نہیں کیا۔

اہل مکہ میں سے ایک شخص ابو حنظلہ سے روایت ہے کہ سیدنا علی رضی اللہ عنہ نے ابوجہل کی بیٹی کا رشتہ مانگا، تو اس کے گھر والوں نے کہا: ہم رسول اللہ ﷺ کی صاحبزادی کی موجودگی میں تمہارا نکاح اپنی بیٹی سے نہیں کریں گے، جب یہ بات رسول اللہ ﷺ تک پہنچی تو آپ ﷺ نے فرمایا: ”فاطمہ تو میرا ایک ٹکڑا ہے، پس جس نے اسے اذیت دی اس نے مجھے اذیت دی۔“