المستدرك على الصحيحين

عبداللہ بن محمد بن حنفیہ سے روایت ہے کہ لوگوں نے میرے والد (محمد بن حنفیہ) سے کہا: ”اے مہدی! آپ پر سلام ہو،“ تو انہوں نے فرمایا: ”سبحان اللہ! کیا میں نے تمہیں اس سے منع نہیں کیا تھا؟ مہدی تو وہ ہے جسے اللہ عزوجل ہدایت عطا فرما دے۔“ اس بات کا واضح بیان کہ امیر المؤمنین علی بن ابی طالب رضی اللہ عنہ نے اپنے مخصوص پیروکاروں میں سے ایک گروہ کو اس لیے دور کر دیا اور ان سے ہجرت (قطع تعلق) کر لی کیونکہ وہ سیدنا ابوبکر، عمر اور عثمان رضی اللہ عنہم کے بارے میں ایسی باتیں کرتے تھے جن کے وہ اہل نہ تھے اور وہ رسول اللہ ﷺ کے دیگر صحابہ کو برا بھلا کہتے تھے، یہاں تک کہ وہ لوگ آپ سے جدا ہو کر حروراء کی طرف چلے گئے، ان میں عبداللہ بن کواء یشکری اور شبث بن ربعی تمیمی شامل تھے۔

سیدنا ابو وائل سے روایت ہے کہ عبداللہ بن کوا، شبث بن ربعی اور ان کے ساتھ کچھ دیگر لوگوں نے صفیین سے کوفہ واپسی کے بعد سیدنا علی رضی اللہ عنہ سے علیحدگی اختیار کر لی، کیونکہ سیدنا علی رضی اللہ عنہ نے سیدنا ابوبکر اور سیدنا عمر رضی اللہ عنہما اور ان کے بعد دیگر صحابہ کرام کو برا بھلا کہنے پر ان کی سخت مذمت کی تھی، چنانچہ ان لوگوں نے آپ کی مخالفت کی اور آپ کے خلاف نکل کھڑے ہوئے، پھر سیدنا علی رضی اللہ عنہ ان کے پاس تشریف لے گئے اور ان سے دلیل کے ساتھ گفتگو کی اور جنگ کیے بغیر ہی واپس لوٹ آئے۔
امام حاکم فرماتے ہیں کہ ابواسحاق فزاری کی شعبہ سے روایت میں کچھ زائد الفاظ ہیں جن میں سیدنا علی رضی اللہ عنہ کی یہ قسم بھی مذکور ہے: «إِنِّي لَا أُسَاكِنُكُمْ فِي بَلْدَةٍ حَتَّى أَلْقَى اللَّهَ عَزَّ وَجَلَّ» ”میں تمہارے ساتھ اس شہر میں نہیں رہوں گا یہاں تک کہ میں اللہ عزوجل سے جا ملوں۔“