المستدرك على الصحيحين

جری بن کلیب عامری سے روایت ہے کہ جب سیدنا علی رضی اللہ عنہ صفین کی طرف روانہ ہوئے تو مجھے قتال ناپسند محسوس ہوا، چنانچہ میں مدینہ آگیا اور ام المومنین سیدہ میمونہ بنت حارث رضی اللہ عنہا کی خدمت میں حاضر ہوا، انہوں نے پوچھا: ”تم کہاں سے ہو؟“ میں نے عرض کیا: اہل کوفہ میں سے ہوں، انہوں نے پوچھا: ”کون سے قبیلے سے؟“ میں نے کہا: بنی عامر سے، انہوں نے فرمایا: ”خوش آمدید، تمہارا آنا مبارک ہو، یہاں کیسے آنا ہوا؟“ میں نے عرض کیا: سیدنا علی رضی اللہ عنہ صفین کی طرف نکلے ہیں اور مجھے جنگ ناپسند تھی اس لیے میں یہاں آگیا، انہوں نے پوچھا: ”کیا تم نے ان کی بیعت کر رکھی تھی؟“ میں نے عرض کیا: جی ہاں، انہوں نے فرمایا: ”تو پھر ان کے پاس واپس چلے جاؤ اور ان کے ساتھ رہو، اللہ کی قسم! نہ وہ خود گمراہ ہوئے ہیں اور نہ ہی ان کے ذریعے کوئی گمراہ ہوا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عمران بن حصین رضی اللہ عنہ سے روایت ہے کہ رسول اللہ ﷺ نے فرمایا: ”علی کی طرف دیکھنا عبادت ہے۔“
یہ حدیث صحیح الاسناد ہے اور سیدنا عبداللہ بن مسعود رضی اللہ عنہ سے مروی اس کے شواہد بھی صحیح ہیں۔

سیدنا عبداللہ بن مسعود رضی اللہ عنہ سے روایت ہے کہ رسول اللہ ﷺ نے فرمایا: ”علی کے چہرے کی طرف دیکھنا عبادت ہے۔“ اس روایت کی متابعت عمرو بن مرہ نے ابراہیم نخعی کے واسطے سے بھی کی ہے۔