المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ سیدنا علی رضی اللہ عنہ نے اپنی جان کا سودا کیا اور نبی کریم ﷺ کی چادر اوڑھ کر آپ کی جگہ سو گئے، مشرکین رسول اللہ ﷺ کے بستر پر (پتھر) پھینک رہے تھے جبکہ آپ ﷺ نے علی رضی اللہ عنہ کو اپنی چادر پہنا دی تھی، قریش نبی کریم ﷺ کو شہید کرنے کے درپے تھے، وہ مسلسل علی رضی اللہ عنہ پر پتھر مارتے رہے اور یہی گمان کرتے رہے کہ وہ نبی کریم ﷺ ہیں جنہوں نے اپنی چادر اوڑھ رکھی ہے، اس دوران علی رضی اللہ عنہ (تکلیف کی وجہ سے) کروٹیں بدلتے اور تڑپتے رہے، پھر جب مشرکین کو معلوم ہوا کہ یہ تو علی ہیں، تو انہوں نے کہا: تم تو بہت کم ظرف نکلے، تم تڑپ رہے تھے جبکہ تمہارے ساتھی (محمد ﷺ) تو کبھی نہیں تڑپتے تھے، اور ہمیں تمہاری اس حالت پر شک تو ہوا تھا۔
یہ حدیث صحیح الاسناد ہے اور اسے شیخین نے روایت نہیں کیا، اسے ابو داؤد طیالسی وغیرہ نے بھی ابو عوانہ سے بعض الفاظ کے اضافے کے ساتھ روایت کیا ہے۔

سیدنا علی بن حسین سے روایت ہے کہ بے شک اللہ کی رضا کی خاطر اپنی جان پیش کر دینے والے سب سے پہلے شخص علی بن ابی طالب رضی اللہ عنہ ہیں، اور علی رضی اللہ عنہ نے رسول اللہ ﷺ کے بستر پر اس پرخطر رات میں یہ اشعار کہے: ”میں نے اپنی جان کے ذریعے اس ہستی کی حفاظت کی جو کنکریوں پر چلنے والوں اور بیتِ عتیق و حجرِ اسود کا طواف کرنے والوں میں سب سے بلند مرتبہ ہے، یعنی اللہ کے رسول (ﷺ)، جن کے متعلق اندیشہ تھا کہ دشمن مکر کریں گے، تو اللہ تعالیٰ نے جو صاحبِ فضل ہے انہیں اس مکر سے نجات دے دی، اللہ کے رسول ﷺ تو غار میں مکمل امن کے ساتھ رہے جہاں اللہ کی حفاظت اور پردہ ان کے ساتھ تھا، جبکہ میں ساری رات دشمنوں کی نگرانی کرتا رہا اور وہ میری موت کی تمنا کر رہے تھے، حالانکہ میں نے اپنے نفس کو قتل ہونے اور قید ہونے کے لیے بالکل تیار کر لیا تھا۔“