المستدرك على الصحيحين

سیدنا اسامہ بن زید رضی اللہ عنہ سے روایت ہے کہ میں مسجد میں تھا کہ سیدنا عباس اور سیدنا علی رضی اللہ عنہما میرے پاس آئے اور کہا: ”اے اسامہ! ہمارے لیے رسول اللہ ﷺ سے (ملنے کی) اجازت طلب کرو،“ میں نے نبی کریم ﷺ کی خدمت میں حاضر ہو کر عرض کیا کہ عباس اور علی (رضی اللہ عنہما) اجازت مانگ رہے ہیں، آپ ﷺ نے پوچھا: ”کیا تم جانتے ہو وہ کس کام سے آئے ہیں؟“ میں نے کہا: ”اللہ کی قسم! میں نہیں جانتا،“ آپ ﷺ نے فرمایا: ”لیکن میں جانتا ہوں، انہیں اندر آنے دو،“ وہ دونوں حاضر ہوئے اور عرض کیا: ”یا رسول اللہ! ہم آپ سے یہ پوچھنے آئے ہیں کہ آپ کے اہل خانہ میں آپ کو سب سے زیادہ محبوب کون ہے؟“ آپ ﷺ نے فرمایا: ”فاطمہ بنت محمد میرے اہل خانہ میں مجھے سب سے زیادہ محبوب ہیں،“ انہوں نے عرض کیا: ”یا رسول اللہ! ہم آپ سے فاطمہ رضی اللہ عنہا کے بارے میں نہیں پوچھ رہے،“ آپ ﷺ نے فرمایا: ”پھر اسامہ بن زید جس پر اللہ نے بھی انعام کیا اور میں نے بھی۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا انس رضی اللہ عنہ سے روایت ہے کہ سیدنا زید بن حارثہ رضی اللہ عنہ رسول اللہ ﷺ کے پاس سیدہ زینب بنت جحش رضی اللہ عنہا کی شکایت لے کر آئے، تو نبی کریم ﷺ نے فرمایا: ”اپنی بیوی کو اپنے پاس روکے رکھو،“ تب یہ آیت نازل ہوئی: ﴿وَتُخْفِي فِي نَفْسِكَ مَا اللَّهُ مُبْدِيهِ﴾ [سورة الاحزاب: 37] ”اور آپ اپنے دل میں وہ بات چھپائے ہوئے تھے جسے اللہ ظاہر کرنے والا تھا۔“