المستدرك على الصحيحين

سیدنا عبداللہ بن عباس رضی اللہ عنہما سے روایت ہے، انہوں نے فرمایا: ”تم مجھ سے سورۃ النساء کے بارے میں سوال کرو، کیونکہ میں نے بچپن ہی میں قرآن پڑھ لیا تھا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا عبداللہ بن عباس رضی اللہ عنہما سے اللہ تعالیٰ کے فرمان ﴿وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ﴾ ”اور اللہ سے ڈرو جس کے نام کے واسطے سے تم ایک دوسرے سے سوال کرتے ہو اور رشتوں (کی پامالی) سے بچو“ [سورة النساء: 1] کے بارے میں روایت ہے، انہوں نے فرمایا: ”بلاشبہ رشتہ داری کاٹ دی جاتی ہے اور نعمت کی ناشکری کی جاتی ہے، لیکن اللہ تعالیٰ جب دلوں میں الفت پیدا کر دیتا ہے تو کوئی چیز انہیں کبھی جدا نہیں کر سکتی“ پھر انہوں نے یہ آیت پڑھی: ﴿لَوْ أَنْفَقْتَ مَا فِي الْأَرْضِ جَمِيعًا مَا أَلَّفْتَ بَيْنَ قُلُوبِهِمْ﴾ ”اگر آپ زمین میں موجود تمام خزانے بھی خرچ کر دیتے تو ان کے دلوں میں الفت پیدا نہ کر سکتے“ [سورة الأنفال: 63]۔ سیدنا ابن عباس رضی اللہ عنہما کہتے ہیں کہ رسول اللہ ﷺ نے فرمایا: «الرَّحِمُ شُعْبَةٌ مِنَ الرَّحْمَنِ، وَإِنَّهَا تَجِيءُ يَوْمَ الْقِيَامَةِ تَكَلَّمُ بِلِسَانٍ طَلِيقٍ ذَلِيقٍ، فَمَنْ أَشَارَتْ إِلَيْهِ بِوَصْلٍ وَصَلَهُ اللهُ، وَمَنْ أَشَارَتْ إِلَيْهِ بِقَطْعٍ قَطَعَهُ اللهُ» ”رشتہ داری (رحم) رحمن کی ایک شاخ ہے، اور یہ قیامت کے دن آئے گی تو نہایت فصیح و بلیغ زبان میں کلام کرے گی، پس جس کی طرف یہ (اللہ کے حضور) جڑنے کا اشارہ کرے گی اللہ اسے (اپنی رحمت سے) جوڑ دے گا، اور جس کی طرف یہ کاٹنے کا اشارہ کرے گی اللہ اسے (اپنی رحمت سے) کاٹ دے گا۔“
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا۔

سیدنا انس بن مالک رضی اللہ عنہ سے روایت ہے کہ سیدنا ابوطرحہ اور سیدہ ام سلیم رضی اللہ عنہما کے درمیان کچھ (ناخوشگوار) گفتگو ہوئی، جس پر ابوطرحہ نے انہیں طلاق دینے کا ارادہ کیا، یہ خبر نبی کریم ﷺ تک پہنچی تو آپ ﷺ نے فرمایا: «إِنَّ طَلَاقَ أُمِّ سُلَيْمٍ لَحُوبٌ» ”یقیناً ام سلیم کو طلاق دینا بہت بڑا گناہ ہے۔“
اس حدیث کی سند صحیح ہے لیکن شیخین نے اسے روایت نہیں کیا۔