المستدرك على الصحيحين

سیدہ میمونہ رضی اللہ عنہا سے روایت ہے کہ میں نے اپنی ایک لونڈی آزاد کی، پھر نبی کریم ﷺ میرے پاس تشریف لائے تو میں نے آپ ﷺ کو اس کے آزاد کرنے کی خبر دی، آپ ﷺ نے فرمایا: ”سنو! اگر تم یہ لونڈی اپنے ننھیالی رشتہ داروں (ماموں زادوں) کو دے دیتیں تو یہ تمہارے اجر کے لیے زیادہ بڑی بات ہوتی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابوبکر صدیق رضی اللہ عنہ کے غلام سیدنا سعد رضی اللہ عنہ سے روایت ہے کہ رسول اللہ ﷺ نے سیدنا ابوبکر صدیق رضی اللہ عنہ سے فرمایا - جبکہ سعد ان کے مملوک تھے اور رسول اللہ ﷺ کو ان کی خدمت گزاری بہت پسند تھی - تو رسول اللہ ﷺ نے ارشاد فرمایا: ”اے ابوبکر! سعد کو آزاد کر دو۔“ انہوں نے عرض کی: یا رسول اللہ! ہمارے پاس ان کے علاوہ کوئی خادم نہیں ہے، تو رسول اللہ ﷺ نے فرمایا: ”تمہارے پاس (دیگر خدمت گزار) مرد آ چکے ہیں، تمہارے پاس مرد آ چکے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔