المستدرك على الصحيحين

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ نے فرمایا: ”جب تمہارے بھائی غزوہ احد میں شہید ہوئے تو اللہ تعالیٰ نے ان کی روحوں کو سبز پرندوں کے پیٹ میں رکھ دیا جو جنت کی نہروں پر اترتے ہیں، اس کے پھل کھاتے ہیں اور عرش کے سائے میں لٹکنے والی سونے کی قندیلوں میں آرام کرتے ہیں، جب انہوں نے اپنے کھانے پینے اور آرام گاہ کی پاکیزگی و لطافت کو دیکھا تو کہنے لگے: کون ہے جو ہمارے بھائیوں کو یہ پیغام پہنچا دے کہ ہم جنت میں زندہ ہیں اور ہمیں رزق دیا جا رہا ہے، تاکہ وہ جہاد سے بے رغبتی نہ کریں اور جنگ سے جی نہ چرائیں؟ تو اللہ عزوجل نے فرمایا: میں تمہاری طرف سے انہیں یہ پیغام پہنچا دیتا ہوں“، راوی کہتے ہیں: تب اللہ تعالیٰ نے یہ آیت نازل فرمائی: ﴿وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا﴾ ”اور جو لوگ اللہ کی راہ میں قتل کیے گئے ہیں، انہیں ہرگز مردہ نہ سمجھیں۔“ [سورة آل عمران: 169]
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عتیک رضی اللہ عنہ سے روایت ہے کہ انہوں نے رسول اللہ ﷺ کو فرماتے ہوئے سنا کہ آپ ﷺ نے فرمایا: ”جو شخص اللہ کی راہ میں جہاد کی نیت سے اپنے گھر سے نکلا“، راوی کہتے ہیں کہ پھر آپ ﷺ نے اپنی تین انگلیاں ملائیں اور فرمایا: ”اور اللہ کی راہ میں جہاد کرنے والے کہاں (بڑے اجر والے) ہیں؟ جو اللہ کی راہ میں نکلا، پھر اپنی سواری سے گر کر مر گیا تو اس کا اجر اللہ کے ذمے ثابت ہو گیا، اور اگر اسے کسی جانور نے ڈس لیا اور وہ مر گیا تو اس کا اجر اللہ کے ذمے ثابت ہو گیا، اور جو اپنی فطری موت مر گیا“، راوی کہتے ہیں کہ یہ ایسا کلمہ (حتف أنفه) ہے جو میں نے رسول اللہ ﷺ سے پہلے کسی عرب سے نہیں سنا تھا، یعنی اپنی خواب گاہ (بستر) پر فوت ہونا، ”تو اس کا اجر اللہ کے ذمے ثابت ہو گیا، اور جو (میدانِ جنگ میں) اچانک قتل کر دیا گیا تو اس کے لیے جنت واجب ہو گئی۔“
یہ حدیث صحیح الاسناد ہے لیکن شیخین نے اسے روایت نہیں کیا۔