المستدرك على الصحيحين

سیدنا ابوبرزہ اسلمی رضی اللہ عنہ سے روایت ہے کہ رسول اللہ ﷺ اپنی زندگی کے آخری ایام میں جب مجلس طویل ہو جاتی تو اٹھتے وقت یہ فرماتے: «سُبْحَانَكَ اللهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ» ”اے اللہ! تو اپنی حمد کے ساتھ پاک ہے، میں گواہی دیتا ہوں کہ تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں“، ہم میں سے کسی نے عرض کیا: اے اللہ کے رسول! یہ ایسے کلمات ہیں جو پہلے ہم نے آپ سے نہیں سنے تھے (کیا یہ نئے ہیں)؟ آپ ﷺ نے فرمایا: ”یہ ان کوتاہیوں کا کفارہ ہیں جو مجلس کے دوران ہو جاتی ہیں۔“

سیدنا رافع بن خدیج رضی اللہ عنہ سے روایت ہے کہ رسول اللہ ﷺ کے پاس جب آپ کے صحابہ جمع ہوتے اور آپ ﷺ وہاں سے اٹھنے کا ارادہ فرماتے تو یہ کہتے: «سُبْحَانَكَ اللهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ، عَمِلْتُ سُوءًا وَظَلَمْتُ نَفْسِي، فَاغْفِرْ لِي، فَإِنَّهُ لَا يَغْفِرُ الذُّنُوبَ إِلَّا أَنْتَ» ”اے اللہ! تو اپنی حمد کے ساتھ پاک ہے، میں گواہی دیتا ہوں کہ تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں، میں نے برا عمل کیا اور اپنی جان پر ظلم کیا، پس مجھے بخش دے، کیونکہ تیرے سوا کوئی گناہوں کو معاف نہیں کر سکتا“، ہم نے عرض کیا: اے اللہ کے رسول! کیا یہ کلمات آپ نے حال ہی میں اختیار فرمائے ہیں؟ آپ ﷺ نے فرمایا: ”ہاں، میرے پاس جبریل علیہ السلام آئے اور انہوں نے مجھ سے کہا: اے محمد! یہ کلمات مجلسوں کے (گناہوں کا) کفارہ ہیں۔“