المستدرك على الصحيحين

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”جو لوگ کسی ایسی مجلس میں بیٹھے جس میں بے ہودہ باتیں زیادہ ہوئیں، پھر وہاں سے اٹھنے سے پہلے کسی کہنے والے نے یہ کلمات کہے: «سُبْحَانَكَ رَبَّنَا وَبِحَمْدِكَ، لَا إِلَهَ إِلَّا أَنْتَ، أَسْتَغْفِرُكَ ثُمَّ أَتُوبُ إِلَيْكَ» ”اے ہمارے رب! تو اپنی حمد کے ساتھ پاک ہے، تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں“ تو اس کے اس مجلس میں ہونے والے گناہ معاف کر دیے جاتے ہیں۔“
یہ اسناد امام مسلم کی شرط پر صحیح ہے، البتہ امام بخاری نے وہیب کی روایت کی وجہ سے اسے معلل قرار دیا ہے جو اسے کعب احبار کا قول قرار دیتی ہے۔

سیدنا جبیر بن مطعم رضی اللہ عنہ سے روایت ہے کہ رسول اللہ ﷺ نے فرمایا: ”جس نے یہ کلمات کہے: «سُبْحَانَ اللهِ وَبِحَمْدِهِ، سُبْحَانَكَ اللهُمَّ وَبِحَمْدِكَ، أَشْهَدُ أَنْ لَا إِلَهَ إِلَّا أَنْتَ، أَسْتَغْفِرُكَ وَأَتُوبُ إِلَيْكَ» ”اللہ اپنی حمد کے ساتھ پاک ہے، اے اللہ! تو اپنی حمد کے ساتھ پاک ہے، میں گواہی دیتا ہوں کہ تیرے سوا کوئی معبود نہیں، میں تجھ سے بخشش مانگتا ہوں اور تیری طرف توبہ کرتا ہوں“، پس اگر اس نے یہ کلمات کسی ذکر کی مجلس میں کہے تو یہ اس مجلس کی نیکیوں پر مہر (محافظ) ثابت ہوں گے، اور اگر کسی لغو یا فضول باتوں والی مجلس میں کہے تو یہ اس کے گناہوں کا کفارہ بن جائیں گے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔