المستدرك على الصحيحين

سیدنا ابن عمر رضی اللہ عنہما سے روایت ہے کہ رسول اللہ ﷺ یہ دعا فرمایا کرتے تھے: «اللَّهُمَّ إِنِّي أَعُوذُ بِكَ مِنْ زَوالِ نِعْمَتِكَ، وَمِنْ تَحَوُّلِ عافِيَتِكَ، وَمِنْ فُجاءَةِ نِقْمَتِكَ، وَمِنْ جَمِيعِ سَخَطِكَ» ”اے اللہ! میں تیری پناہ مانگتا ہوں تیری نعمت کے چھن جانے سے، تیری عطا کردہ عافیت کے بدل جانے سے، تیری ناگہانی پکڑ سے اور تیری ہر قسم کی ناراضگی سے۔“ ابن وہب کہتے ہیں کہ یعقوب نے اسے ابن عمر سے موصولاً بیان کیا جبکہ حفص نے اسے مرسل روایت کیا ہے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”اللہ کی پناہ مانگو فقر سے، کمی (تنگ دستی) سے، ذلت سے، اور اس بات سے کہ تم کسی پر ظلم کرو یا تم پر ظلم کیا جائے۔“
اس حدیث کی سند صحیح ہے لیکن شیخین نے اسے روایت نہیں کیا۔