المستدرك على الصحيحين

سیدنا معاذ بن انس رضی اللہ عنہ سے روایت ہے کہ نبی کریم ﷺ نے فرمایا: ”جس نے کھانا کھایا اور پھر یہ کہا: «الْحَمْدُ للهِ الَّذِي أَطْعَمَنِي هَذَا، وَرَزَقَنِيهِ مِنْ غَيْرِ حَوْلٍ مِنِّي وَلَا قُوَّةٍ» ”تمام تعریفیں اس اللہ کے لیے ہیں جس نے مجھے یہ کھانا کھلایا اور میری کسی اپنی کوشش اور قوت کے بغیر مجھے یہ رزق عطا فرمایا“ تو اس کے سابقہ تمام گناہ معاف کر دیے جاتے ہیں، اور جس نے لباس پہنا اور یہ کہا: «الْحَمْدُ للهِ الَّذِي كَسَانِي هَذَا مِنْ غَيْرِ حَوْلٍ مِنِّي وَلَا قُوَّةٍ» ”تمام تعریفیں اس اللہ کے لیے ہیں جس نے مجھے یہ لباس پہنایا اور میری کسی اپنی کوشش اور قوت کے بغیر مجھے یہ عطا فرمایا“ تو اس کے گذشتہ گناہ معاف کر دیے جاتے ہیں۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔

سیدنا جابر رضی اللہ عنہ سے روایت ہے کہ رسول اللہ ﷺ نے فرمایا: ”اللہ تعالیٰ اپنے کسی بندے پر جب بھی کوئی نعمت نازل فرماتا ہے اور وہ اس کے جواب میں «الْحَمْدُ للهِ» کہتا ہے تو یقیناً اس نے اس نعمت کا شکر ادا کر دیا، اگر وہ دوسری مرتبہ یہی کلمات کہے تو اللہ تعالیٰ اس کے لیے ثواب میں اضافہ فرما دیتا ہے، اور اگر وہ تیسری مرتبہ کہے تو اللہ تعالیٰ اس کے گناہ بخش دیتا ہے۔“
یہ حدیث صحیح ہے لیکن شیخین نے اسے روایت نہیں کیا، البتہ ان دونوں نے ابومعاویہ کی روایت نقل نہیں کی۔

سیدنا شداد بن اوس رضی اللہ عنہ (جو کہ ایک بدری صحابی ہیں) سے روایت ہے کہ وہ ایک سفر میں تھے کہ لوگ ناشتہ کرنے کے لیے ایک مقام پر اترے، شداد رضی اللہ عنہ نے کہا: یہ دسترخوان قریب لاؤ تاکہ ہم اس سے شغل (کھانا تناول) کریں، پھر فوراً ہی (اپنے ان الفاظ پر ندامت محسوس کرتے ہوئے) کہا: میں اللہ سے مغفرت مانگتا ہوں، جب سے میں اسلام لایا ہوں میں نے کبھی کوئی ایسی بات نہیں کہی جس کی میں نے لگام نہ تھامی ہو یا اسے پوری طرح سوچ سمجھ کر نہ بولا ہو سوائے اپنی اس بات کے، (یاد رکھو) محمد ﷺ نے اس طرح نہیں فرمایا تھا بلکہ آپ ﷺ نے فرمایا تھا: ”اے شداد! جب تم لوگوں کو دیکھو کہ وہ سونے اور چاندی کے خزانے جمع کر رہے ہیں تو تم ان کلمات کو بطور خزانہ جمع کر لیا کرو: «اللَّهُمَّ إِنِّي أَسْأَلُكَ التَّثَبُّتَ فِي الْأُمُورِ، وَعَزِيمَةَ الرُّشْدِ، وَأَسْأَلُكَ شُكْرَ نِعْمَتِكَ، وَحُسْنَ عِبَادَتِكَ، وَأَسْأَلُكَ قَلْبًا سَلِيمًا، وَلِسَانًا صَادِقًا، وَخُلُقًا مُسْتَقِيمًا، وَأَسْتَغْفِرُكَ لِمَا تَعْلَمُ، وَأَسْأَلُكَ مِنْ خَيْرِ مَا تَعْلَمُ، وَأَعُوذُ بِكَ مِنْ شَرِّ مَا تَعْلَمُ، إِنَّكَ أَنْتَ عَلَّامُ الْغُيُوبِ» ”اے اللہ! میں تجھ سے تمام معاملات میں ثابت قدمی اور نیکی پر استقامت کا سوال کرتا ہوں، اور میں تجھ سے تیری نعمت کا شکر ادا کرنے اور تیری بہترین عبادت کرنے کی توفیق مانگتا ہوں، اور میں تجھ سے قلبِ سلیم، سچی زبان اور درست اخلاق کا سوال کرتا ہوں، اور میں ان تمام گناہوں کی مغفرت چاہتا ہوں جو تیرے علم میں ہیں، اور میں تجھ سے ان تمام بھلائیوں کا سوال کرتا ہوں جو تیرے علم میں ہیں، اور میں تیری پناہ مانگتا ہوں ان تمام برائیوں سے جو تیرے علم میں ہیں، بے شک تو ہی تمام پوشیدہ باتوں کا خوب جاننے والا ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔