المستدرك على الصحيحين

سیدنا حجاج بن عمرو انصاری رضی اللہ عنہ سے روایت ہے کہ رسول اللہ ﷺ نے فرمایا: ”جس کی ہڈی ٹوٹ جائے یا وہ لنگڑا ہو جائے تو وہ حلال ہو گیا (احرام کھول دے) اور اس پر اگلے سال دوبارہ حج لازم ہے۔“ عکرمہ رحمہ اللہ کہتے ہیں کہ میں نے اس بارے میں سیدنا ابوہریرہ اور سیدنا ابن عباس رضی اللہ عنہم سے پوچھا تو انہوں نے فرمایا کہ حجاج بن عمرو نے سچ کہا ہے۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہما سے روایت ہے کہ نبی کریم ﷺ نے ہجرت سے قبل دو حج کیے اور ہجرت کے بعد ایک حج کیا جس میں آپ ﷺ نے حج کے ساتھ عمرہ ملایا تھا (یعنی حجِ قران کیا تھا)۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابن عباس رضی اللہ عنہما سے روایت ہے کہ سیدنا اقرع بن حابس رضی اللہ عنہ نے رسول اللہ ﷺ سے دریافت کیا: کیا حج ہر سال فرض ہے؟ آپ ﷺ نے فرمایا: ”نہیں، بلکہ زندگی میں صرف ایک بار ہے، اور اگر میں ہاں کہہ دیتا تو یہ ہر سال واجب ہو جاتا، اور اگر ایسا ہو جاتا تو تم نہ اسے سنتے اور نہ اس کی اطاعت کر پاتے۔“