المستدرك على الصحيحين

ایاس بن ابورملہ شامی کہتے ہیں کہ میں نے سیدنا معاویہ بن ابوسفیان رضی اللہ عنہ کو دیکھا جب وہ سیدنا زید بن ارقم رضی اللہ عنہ سے پوچھ رہے تھے کہ کیا آپ رسول اللہ ﷺ کے ساتھ ایسے کسی موقع پر حاضر تھے جب ایک ہی دن میں دو عیدیں (عید اور جمعہ) اکٹھی ہو گئی ہوں؟ انہوں نے کہا: ہاں، معاویہ رضی اللہ عنہ نے پوچھا: آپ ﷺ نے اس دن کیا کیا تھا؟ انہوں نے کہا: آپ ﷺ نے عید کی نماز پڑھائی اور پھر جمعہ (کی حاضری) میں رخصت دے دی اور فرمایا: ”جو شخص جمعہ پڑھنا چاہے وہ پڑھ لے۔“
اس حدیث کی سند صحیح ہے لیکن شیخین نے اسے روایت نہیں کیا۔ اس کا ایک شاہد امام مسلم کی شرط پر بھی موجود ہے:

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”تمہارے آج کے اس دن میں دو عیدیں جمع ہو گئی ہیں، پس جو چاہے اس کے لیے عید کی نماز جمعہ سے کافی ہو جائے گی، لیکن ہم تو جمعہ قائم کرنے والے ہیں۔“
یہ حدیث امام مسلم کی شرط پر صحیح ہے، بقیہ بن ولید جب مشہور راویوں سے روایت کریں تو ان کی سچائی میں کوئی اختلاف نہیں، اور یہ شعبہ، مغیرہ اور عبدالعزیز کی روایت سے ایک غریب حدیث ہے، اور یہ سب ایسے راوی ہیں جن کی حدیث (استدلال کے لیے) جمع کی جاتی ہے۔

سیدنا عدی بن حاتم رضی اللہ عنہ سے روایت ہے کہ ایک خطیب نے نبی کریم ﷺ کے پاس خطبہ دیا اور کہا: ”جس نے اللہ اور اس کے رسول کی اطاعت کی وہ ہدایت پا گیا اور جس نے ان دونوں کی نافرمانی کی (جس کے لیے اس نے تثنیہ کی ضمیر استعمال کی) وہ گمراہ ہو گیا، تو آپ ﷺ نے فرمایا: ”کھڑے ہو جاؤ -یا فرمایا چلے جاؤ- تم بہت برے خطیب ہو۔““
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔