مستدرکِ حاکم

سیدنا سہل بن حنظلیہ رضی اللہ عنہ بیان کرتے ہیں کہ جب رسول اللہ ﷺ حنین کی طرف روانہ ہوئے تو فرمایا: ”کیا کوئی شخص ہے جو آج رات ہماری نگہبانی کرے؟“ سیدنا انس بن ابی مرثد غنوی رضی اللہ عنہ نے عرض کیا: یا رسول اللہ! میں (حاضر ہوں)، آپ ﷺ نے فرمایا: ”جاؤ۔“ اگلے دن نبی کریم ﷺ باہر تشریف لائے اور فرمایا: ”کیا تمہیں اپنے شہسوار کی کوئی خبر ملی؟“ لوگوں نے عرض کیا: نہیں، چنانچہ نبی کریم ﷺ نماز پڑھنے لگے اور (نماز کے دوران) گھاٹی کی طرف دیکھتے رہے (تاکہ پہرے دار کی خبر لیں)، جب سلام پھیرا تو فرمایا: "تمہارا شہسوار آ چکا ہے،" جب وہ آئے تو آپ ﷺ نے فرمایا: ”شاید تم (کہیں سواری سے) اترے تھے؟“ انہوں نے عرض کیا: نہیں، سوائے نماز پڑھنے یا قضائے حاجت کے، پھر انہوں نے کہا: میں نے دونوں گھاٹیوں پر چڑھ کر دیکھا تو ہوازن اپنی ہودج نشین عورتوں، بکریوں اور اونٹوں سمیت حنین کی طرف بڑھ رہے تھے، تو رسول اللہ ﷺ نے فرمایا: «غَنِيمَةٌ لِلْمُسْلِمِينَ غَدًا إِنْ شَاءَ اللَّهُ.» ”ان شاء اللہ یہ کل مسلمانوں کے لیے غنیمت ہو گا۔“

سیدنا زید بن ثابت رضی اللہ عنہ سے مروی ہے کہ رسول اللہ ﷺ مغرب کی دونوں رکعتوں میں سورہ اعراف پڑھا کرتے تھے۔
یہ حدیث شیخین کی شرط پر صحیح ہے بشرطیکہ اس میں ارسال نہ ہو، لیکن انہوں نے اسے اس لفظ کے ساتھ روایت نہیں کیا بلکہ صرف طویل قرأت پر اتفاق کیا ہے۔