مصنف ابن ابي شيبه

حضرت ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے گھوڑے اور دوسرے جانوروں کو خصی کرنے سے منع فرمایا۔ اور حضرت ابن عمر رضی اللہ عنہما نے فرمایا : ان میں مخلوق کی بڑھوتری ہے۔

ابراہیم رحمہ اللہ فرماتے ہیں کہ حضرت عمر رضی اللہ عنہ نے خط لکھ کر گھوڑے کو خصی کرنے سے منع کیا۔

حضرت ابراہیم بن مہاجر البجلی رحمہ اللہ فرماتے ہیں کہ حضرت عمر رضی اللہ عنہ نے خط لکھا : کہ گھوڑوں کو خصی مت کیا جائے اور ان کو دو سو سے زیادہ نہ دوڑایا جائے۔

حضرت یزید بن ابی حبیب رحمہ اللہ فرماتے ہیں کہ حضرت عمر بن عبد العزیز رحمہ اللہ نے خط لکھ کر مصر والوں کو منع کیا کہ وہ گھوڑے کو خصی نہ کریں۔ اور بچوں کو گھوڑوں پر نہ دوڑائیں۔

حضرت ربیع بن انس رضی اللہ عنہ فرماتے ہیں کہ میں نے حضرت انس رضی اللہ عنہ کو فرماتے ہوئے سنا کہ اس آیت : { وَلآمُرَنَّہُمْ فَلَیُغَیِّرُنَّ خَلْقَ اللہِ } میں خصی کرنا مراد ہے۔

اسماعیل رحمہ اللہ فرماتے ہیں کہ حضرت ابو صالح رحمہ اللہ نے بھی یہی ارشاد فرمایا : کہ خصی کرنا مراد ہے۔

حضرت ابو مکین رحمہ اللہ فرماتے ہیں کہ حضرت عکرمہ رحمہ اللہ جانوروں کے خصی کرنے کو مکروہ سمجھتے تھے۔

حضرت لیث رحمہ اللہ فرماتے ہیں کہ حضرت عطاء ، حضرت طاؤس ، حضرت مجاہد رحمہ اللہ ، حسن اور حضرت شہر رحمہ اللہ یہ سب حضرات خصی کرنے کو مکروہ سمجھتے تھے۔

حضرت ابن عمر رضی اللہ عنہما فرماتے ہیں کہ حضرت عمر رضی اللہ عنہ نے جانوروں کو خصی کرنے سے منع فرمایا : اور ارشاد فرمایا : کہ نسل میں اضافہ تو آلۂ تناسل کے ساتھ ہوتا ہے۔

حضرت مطرف رحمہ اللہ ایک آدمی سے نقل کرتے ہیں کہ حضرت ابن عباس رضی اللہ عنہما نے ارشاد فرمایا : جانوروں کو خصی کرنا تو مثلہ ہے۔ اور پھر آپ رضی اللہ عنہ نے یہ آیت تلاوت فرمائی : { وَلآمُرَنَّہُمْ فَلَیُغَیِّرُنَّ خَلْقَ اللہِ }