مصنف ابن ابي شيبه

حضرت خلاس فرماتے ہیں کہ حضرت علی رضی اللہ عنہاگے چلنے والے کو ہنکانے والے کو اور سواری پر سوار کو ضامن بناتے تھے۔

حضرت شریح اور ابراہیم اور حضرت شعبی ان سب حضرات نے ارشاد فرمایا : آگے چلنے والے کو ہنکانے والے اور سوار کو ضامن بنایا جائے گا۔

حضرت اسماعیل بن سالم فرماتے ہیں کہ میں نے امام شعبی کو یوں ارشاد فرماتے ہوئے سنا کہ آدمی اپنی سواری کو نرم انداز میں ہنکا رہا ہو تو اس پر کوئی ضمان نہیں ہوگا اور جب وہ جانوروں کو ہنکانے میں سختی برت رہا تھا اور کوئی نقصان ہوگیا تو وہ شخص ضامن ہوگا۔

حضرت اشعث فرماتے ہیں کہ حسن بصری نے ارشاد فرمایا : ہنکانے والے کو اور آگے چلنے والے کو ضامن بنایا جائے گا۔

حضرت خلاس فرماتے ہیں کہ حضرت علی رضی اللہ عنہ نے ارشاد فرمایا : جب راستہ کشاد ہ ہو تو ہنکانے والے پر کوئی ضمان نہیں ہوگا۔

حضرت ابن جریج فرماتے ہیں کہ حضرت عطاء نے ارشاد فرمایا قائد یعنی آگے چلنے والے کو جرمانہ کیا جائے گا۔ میں نے پوچھا ! کیا ہنکانے والے کو بھی ہاتھ اور پاؤں پر چوٹ لگنے کی وجہ سے جرمانہ کیا جائے گا ؟ آپ نے فرمایا : وہ ” راستہ، راستہ “ کی آواز لگائے گا۔

حضرت حسن بن حر فرماتے ہیں کہ حضرت حکم نے ارشاد فرمایا، یقینا ہنکانے والا آگے چلنے والا اور سوار جرمانہ ادا کریں گے جب ان کی سواری ہاتھ یا پاؤں سے تکلیف پہنچائے اور کچل دے یا کسی کو مار دے۔

حضرت لیث فرماتے ہیں کہ حضرت طاؤس نے ارشاد فرمایا : آگے چلنے والے کو، ہنکانے والے کو اور سوار کو ضامن بنایا جائے گا جب ان کی سواری اگلی ٹانگوں سے کسی کو تکلیف پہنچائے۔