مصنف ابن ابي شيبه

حضرت عمر رضی اللہ عنہ نے ارشاد فرمایا : مشرک کا غلام اگر مسلمان ہوجائے ، تو اس سے لے کر وہ غلام مسلمانوں کو فروخت کردیا جائے گا اور اس کا ثمن اس کے مشرک آقا کو دے دیا جائے گا۔

حضرت عمر بن عبد العزیز ذمیوں کے غلاموں کو بیچ دینے کا حکم فرماتے ہیں اگر وہ اسلام لے آئیں۔

حسن فرماتے ہیں کہ اگر نصرانی کی ام ولد مسلمان ہوجائے وہ اپنی قیمت کی ادائیگی کی کوشش کرے گی، اور اگر باندی اسلام لے آئے تو اس کو فروخت کردیا جائے گا۔

حضرت عطاء فرماتے ہیں کہ اگر ذمی کا غلام مسلمان ہوجائے تو اس کے اور اس کے آقا کے درمیان جدائی کردی جائے گی۔

حسن فرماتے ہیں کہ ذمیوں کے غلاموں میں سے جو مسلمان ہوجائے وہ آزاد ہوجائے گا، اگر ذمی مسلمانوں کے کسی قیدی کو خرید لیں پھر وہ مسلمان ہوجائے تو وہ غلام مسلمانوں کو فروخت کردیا جائے گا۔

حسن فرماتے ہیں کہ اگر ذمی کا غلام مسلمان ہوجائے تو اس کو امیر کے پاس لے جایا جائے گا اور اس کو مسلمانوں کو فروخت کردیا جائے، اور اس کا ثمن اس کے آقا کو دے دیا جائے گا۔

حضرت زہری فرماتے ہیں کہ سنت پختہ ہوچکی ہے کہ کافر شخص مسلمان کو غلام نہیں بنا سکتا۔