مصنف ابن ابي شيبه

حضرت نعمان بن ملک فرماتے ہیں کہ میں نے حج تمتع کیا تو میں حضرت ابن عباس رضی اللہ عنہما کے پاس آیا اور ان سے عرض کیا کہ میں نے حج تمتع کیا ہے ؟ آپ نے فرمایا : { مَا اسْتَیْسَرَ مِنَ الْہَدْیِ } میں نے عرض کیا بکری ؟ آپ نے فرمایا ہاں بکری۔

حضرت ابن عمر رضی اللہ عنہما فرماتے ہیں { مَا اسْتَیْسَرَ مِنَ الْہَدْیِ } (جو ھدی میسر ہو) اس سے مراد بکری ہے۔

حضرت ابن عمر رضی اللہ عنہما فرماتے ہیں کہ اللہ کے ارشاد { مَا اسْتَیْسَرَ مِنَ الْہَدْیِ } سے مراد سستا جانور سے لے کر مہنگا جانور سب شامل ہیں۔

ابراہیم فرماتے ہیں کہ ما استیسر من الھدی۔ سے مراد بکری ہے۔

حضرت زہری سے دریافت کیا گیا کہ { مَا اسْتَیْسَرَ مِنَ الْہَدْیِ } سے کیا مراد ہے ؟ آپ نے فرمایا : حضرت ابن عمر رضی اللہ عنہما فرماتے تھے گائے اور اونٹ مراد ہے اور حضرت ابن عباس رضی اللہ عنہما فرماتے تھے بکری مراد ہے۔

حضرت علقمہ فرماتے ہیں کہ اس سے مراد بکری ہے۔

حضرت ابن عمر رضی اللہ عنہما فرماتے ہیں ک جب کوئی شخص حج اور عمرہ میں قران کرے تو اس پر اونٹ ہے، ان سے کہا گیا کہ حضرت ابن مسعود تو فرماتے تھے بکری ہے، حضرت ابن عمر رضی اللہ عنہما نے فرمایا : روزے میرے نزدیک بکری سے زیادہ پسندیدہ ہیں۔

حضرت عائشہ رضی اللہ عنہا اور حضرت ابن عمر رضی اللہ عنہما فرماتے ہیں کہ ھدی اونٹ اور گائے میں سے ہو۔

حضرت ابن زبیر فرماتے ہیں ھدی بڑے پیٹ والے گائے یا اونٹ میں سے ہو۔

حضرت ابن طاؤس کے والد فرماتے ہیں ھدی کے لیے تمہیں اونٹنی اور گائے میسر کر دئیے گئے ہیں۔

حضرت ابو جعفر فرماتے ہیں اس سے مراد بکری ہے۔

حضرت شعبی فرماتے ہیں حج تمتع میں بکری کافی ہوجائے گی۔

حضرت ابن عباس رضی اللہ عنہما فرماتے ہیں { مَا اسْتَیْسَرَ مِنَ الْہَدْیِ } سے مراد بکری ہے۔

حضرت وبرہ بن عبد الرحمن کہتے ہیں کہ میں حضرت ابن عمر رضی اللہ عنہما کے پاس آیا اور ان سے عرض کیا : میرے ذمہ ھدی ہے آپ مجھے کون سے جانور کا حکم دیتے ہیں ؟ آپ نے فرمایا : گائے میں سے ہو یا پھر تین یا سات دن کے روزے جب تم اپنے اھل کی طرف واپس لوٹ جاؤ اور یہ روزے مجھے بکری سے زیادہ پسند ہیں۔

حضرت علی رضی اللہ عنہ فرماتے ہیں ما استیسر من الھدی۔ سے مراد بکری ہے۔

حضرت عائشہ رضی اللہ عنہا اور حضرت ابن عمر رضی اللہ عنہما کے نزدیک { مَا اسْتَیْسَرَ مِنَ الْہَدْیِ } اونٹ یا گائے میں سے ہے اور حضرت ابن عباس رضی اللہ عنہما کے نزدیک { مَا اسْتَیْسَرَ مِنَ الْہَدْیِ } سے مراد بکری ہے۔