مصنف ابن ابي شيبه

حضرت ابن عمر رضی اللہ عنہما فرماتے ہیں کہ نبی کریم صلی اللہ علیہ وآلہ وسلم اپنے اونٹ کی طرف رخ کرکے نماز ادا کیا کرتے تھے۔

حضرت مقدام رہاوی کہتے ہیں کہ حضرت عبادہ بن صامت، حضرت ابو الدرداء اور حضرت حارث بن معاویہ بیٹھے تھے۔ حضرت ابو الدرداء نے کہا کہ تم میں سے کون وہ حدیث سنائے گا جس میں آتا ہے کہ حضور صلی اللہ علیہ وآلہ وسلم نے مال غنیمت کے اونٹ کی طرف رخ کرکے نماز پڑھی تھی ؟ حضرت عبادہ نے کہا میں سناتا ہوں۔ حضرت ابو الدرداء نے کہا سناؤ۔ انہوں نے بیان کیا کہ رسول اللہ صلی اللہ علیہ وآلہ وسلم نے مال غنیمت کے اونٹ کی طرف رخ کرکے نماز پڑھی تھی۔

حضرت ابو ادریس خولانی فرماتے ہیں کہ نبی کریم صلی اللہ علیہ وآلہ وسلم نے اونٹ کی طرف رخ کرکے نماز ادا فرمائی۔

حضرت عمرو فرماتے ہیں کہ جب اونٹ پر کجاوہ ہوتا تو حضرت ابن عمر رضی اللہ عنہما اس کی طرف رخ کرکے نماز ادا فرماتے تھے۔

حضرت نافع فرماتے ہیں کہ حضرت ابن عمر رضی اللہ عنہما اپنی سواری کو چوڑائی کے رخ پر بٹھا کر اس کی طرف رخ کرکے نماز ادا فرماتے تھے۔

حضرت عاصم فرماتے ہیں کہ میں نے حضرت انس کو دیکھا کہ کجاوے کے اونٹ کی طرف رخ کرکے نماز ادا فرما رہے تھے جو ان کے اور قبلے کے درمیان تھا۔

حضرت ابراہیم بن عبد الاعلیٰ فرماتے ہیں کہ میں نے سوید بن غفلہ کو دیکھا کہ وہ مکہ کے راستہ میں اپنے اونٹ کو بٹھاتے اور اس کی طرف رخ کرکے نماز ادا فرماتے تھے۔

حضرت عمارہ کہتے ہیں کہ حضرت اسود اپنی سواری کی طرف رخ کرکے نماز اد ا فرماتے تھے اور وہ سواری ان کے سامنے بیٹھی ہوتی تھی۔

حضرت عبید اللہ بن عمر فرماتے ہیں کہ میں نے حضرت قاسم اور حضرت سالم کو اونٹ کی طرف رخ کرکے نماز ادا کرتے دیکھا ہے۔

حضرت حجاج کہتے ہیں کہ حضرت عطاء اونٹ کے ذریعہ سترہ کیا کرتے تھے۔

حسن فرماتے ہیں کہ اونٹ سے سترہ کرنے میں کوئی حرج نہیں۔