مصنف ابن ابي شيبه

حضرت علی رضی اللہ عنہ فرمایا کرتے تھے کہ اذان اور اقامت دونوں دو دو مرتبہ کہی جائیں گی۔ حضرت علی رضی اللہ عنہایک مرتبہ اقامت کہنے والے مؤذن کو ڈانٹتے اور اسے کہتے اللہ تمہیں اپنی رحمت سے دور کرے، تم نے اقامت دو دو مرتبہ کیوں نہیں کہی ؟

حضرت عبید کہتے ہیں کہ حضرت سلمہ بن اکوع دو مرتبہ اقامت کہا کرتے تھے۔

حضرت عبدالرحمن بن ابی لیلیٰ فرماتے ہیں کہ حضرت عبداللہ بن زید انصاری جو کہ رسول اللہ صلی اللہ علیہ وآلہ وسلم کے مؤذن تھے اذان اور اقامت کو دو دو مرتبہ کہا کرتے تھے۔

حضرت ابو العالیہ فرماتے ہیں کہ جب تم اقامت کہو تو دو مرتبہ کہو۔

ابراہیم فرماتے ہیں کہ تم دو مرتبہ اقامت کہنا مت چھوڑو۔

حضرت ابو اسحاق فرماتے ہیں کہ حضرت علی رضی اللہ عنہ اور حضرت عبداللہ کے شاگرد اذان اور اقامت کو دو دو مرتبہ کہا کرتے تھے۔

ابراہیم فرماتے ہیں کہ حضرت بلال اذان اور اقامت کو دو دو مرتبہ کہا کرتے تھے۔