المعجم الكبير للطبراني

امام زہری رحمہ اللہ بیان کرتے ہیں: رسول اللہ ﷺ نے سیدہ زینب بنت خزیمہ رضی اللہ عنہا سے نکاح کیا، وہ ام المساکین کے نام سے مشہور تھیں، انہیں یہ نام مسکینوں کو کثرت سے کھانا کھلانے کی وجہ سے دیا گیا، وہ بنو ہلال بن عامر بن صعصعہ سے تعلق رکھتی تھیں، اور رسول اللہ ﷺ کی زندگی ہی میں فوت ہو گئیں، ان کا آپ ﷺ کے ساتھ قیام بہت مختصر عرصہ رہا۔

بنو اسد کی ایک عورت بیان کرتی ہے: ایک دن میں سیدہ زینب رضی اللہ عنہا، رسول اللہ ﷺ کی زوجہ، کے پاس تھی اور ہم ان کے لیے گیرو (سرخ رنگ) سے کپڑا تیار کر رہی تھیں، اسی دوران رسول اللہ ﷺ ہمارے پاس تشریف لائے، جب آپ ﷺ نے گیروے کا رنگ دیکھا تو واپس چلے گئے، جب زینب رضی اللہ عنہا نے یہ دیکھا تو سمجھ گئیں کہ رسول اللہ ﷺ کو یہ کام ناپسند آیا، تو انہوں نے پانی لے کر اپنے کپڑے دھوئے اور ہر سرخی چھپا دی، پھر رسول اللہ ﷺ واپس آئے اور جھانک کر دیکھا تو کوئی چیز نظر نہ آئی تو اندر تشریف لے آئے۔

محمد بن اسحاق رحمہ اللہ بیان کرتے ہیں: رسول اللہ ﷺ نے سیدہ زینب بنت خزیمہ ہلالیہ رضی اللہ عنہا، ام المساکین، سے نکاح کیا، آپ ﷺ سے پہلے وہ حصین یا طفیل بن حارث کے نکاح میں تھیں، وہ مدینہ میں فوت ہوئیں اور آپ ﷺ کی ازواج میں سب سے پہلے فوت ہونے والی تھیں۔