المعجم الكبير للطبراني

سیدنا ابوثعلبہ خشنی رضی اللہ عنہ سے روایت ہے کہ رسول اللہ ﷺ نے فرمایا: ”تم میں سے مجھے سب سے زیادہ محبوب اور آخرت میں مجھ سے سب سے قریب وہ لوگ ہیں جن کے اخلاق سب سے اچھے ہیں، اور تم میں سے مجھے سب سے زیادہ ناپسندیدہ اور آخرت میں مجھ سے سب سے دور وہ ہیں جن کے اخلاق سب سے برے ہیں: بہت باتیں بنانے والے، منہ پھلا کر بولنے والے، اور تصنع سے علم جتانے والے۔“

سیدنا ابوثعلبہ رضی اللہ عنہ سے روایت ہے کہ رسول اللہ ﷺ نے فرمایا: ”اللہ نے کچھ فرائض مقرر کیے ہیں، انہیں ضائع نہ کرو، اور کچھ چیزوں سے منع کیا ہے، انہیں پامال نہ کرو، اور کچھ حدیں مقرر کی ہیں، ان سے تجاوز نہ کرو، اور کچھ چیزوں کے بارے میں خاموشی اختیار کی ہے، بھول کر نہیں بلکہ جان بوجھ کر، تو ان کے بارے میں کریدنے کی کوشش نہ کرو۔“

سیدنا ابوثعلبہ رضی اللہ عنہ سے روایت ہے کہ نبی کریم ﷺ نے فرمایا: ”اللہ تعالیٰ شعبان کی پندرہویں رات اپنے بندوں پر نظر رحمت فرماتا ہے، مومنوں کو بخش دیتا ہے، کافروں کو مہلت دیتا ہے، اور کینہ رکھنے والوں کو ان کے کینے کے ساتھ چھوڑ دیتا ہے یہاں تک کہ وہ اسے چھوڑ دیں۔“

سیدنا ابوثعلبہ رضی اللہ عنہ سے روایت ہے کہ رسول اللہ ﷺ نے فرمایا: ”بے شک تمہارا دین نبوت اور رحمت ہے، پھر خلافت اور رحمت ہے، پھر جابرانہ بادشاہت ہے، پھر ظالمانہ بادشاہت آئے گی جس میں شرمگاہ (زنا) اور ریشم حلال سمجھا جائے گا۔“