المعجم الكبير للطبراني

سیدنا ولید بن عقبہ رضی اللہ عنہ سے روایت ہے کہ رسول اللہ ﷺ نے فرمایا: ”جنت والوں میں سے کچھ لوگ جہنم والوں میں سے کچھ لوگوں کے پاس جائیں گے اور کہیں گے: تم کس وجہ سے جہنم میں داخل ہوئے؟ اللہ کی قسم! ہم تو صرف اسی چیز کی وجہ سے جنت میں داخل ہوئے جو ہم نے تم سے سیکھی تھی۔ وہ کہیں گے: ہم نیکی کی بات تو کہتے تھے مگر اس پر عمل نہیں کرتے تھے۔“

سیدنا ولید بن عقبہ فرماتے ہیں: جب رسول اللہ ﷺ نے مکہ فتح کیا تو مکہ والے اپنے بچوں کو آپ ﷺ کے پاس لانے لگے، آپ ﷺ ان کے سروں پر ہاتھ پھیرتے اور ان کے لیے دعا فرماتے۔ مجھے بھی آپ ﷺ کے پاس لایا گیا جبکہ میں خلوق (ایک خوشبو) لگائے ہوئے تھا، تو آپ ﷺ نے میرے سر پر ہاتھ نہیں پھیرا اور نہ مجھے چھوا، اور آپ ﷺ کو اس سے روکنے والی صرف یہی بات تھی کہ میری ماں نے مجھے خلوق لگا رکھی تھی، تو آپ ﷺ نے صرف اسی خلوق کی وجہ سے مجھے ہاتھ نہ لگایا۔

سیدنا ولید بن عقبہ سے بھی نبی کریم ﷺ سے اسی طرح کی حدیث مروی ہے۔

سیدنا ولید بن عقبہ فرماتے ہیں: جب نبی کریم ﷺ نے مکہ فتح کیا تو مکہ والے اپنے بچوں کو آپ ﷺ کے پاس لانے لگے، آپ ﷺ ان کے سروں پر ہاتھ پھیرتے اور ان کے لیے برکت کی دعا فرماتے۔ مجھے بھی آپ ﷺ کے پاس لایا گیا جبکہ میں خلوق لگائے ہوئے تھا، تو آپ ﷺ نے میرا سر نہیں چھوا، اور آپ ﷺ کو اس سے روکنے والی صرف یہی بات تھی کہ میری ماں نے مجھے خلوق لگا رکھی تھی، تو آپ ﷺ نے صرف اسی خلوق کی وجہ سے میرا سر نہیں چھوا۔
امام طبرانی رحمہ اللہ فرماتے ہیں: زید بن ابی الزرقاء نے اسے جعفر سے، انہوں نے ثابت بن حجاج سے، انہوں نے عبداللہ ہمدانی سے، انہوں نے ابوموسیٰ سے، انہوں نے ولید بن عقبہ سے اسی طرح بیان کیا ہے، جبکہ درست یہ ہے کہ یہ عبداللہ ہمدانی ابوموسیٰ ہی سے، اور وہ ولید بن عقبہ سے مروی ہے۔