المعجم الكبير للطبراني

ابو عبیدہ باجی، سیدنا عمران بن حصین رضی اللہ عنہ سے بیان کرتے ہیں کہ وہ کہتے ہیں: میں اپنی قوم کے کچھ لوگوں کے ساتھ رسول اللہ ﷺ کے پاس سواریاں مانگنے آیا، تو آپ ﷺ نے فرمایا: ”اللہ کی قسم، میں تمہیں سواری نہیں دوں گا، اللہ کی قسم، میرے پاس کچھ نہیں جس پر تمہیں سوار کروں“، دو مرتبہ یہی فرمایا۔ پھر نبی کریم ﷺ کے پاس عمدہ کوہان والی اونٹنیوں کے تین قافلے آئے، تو آپ ﷺ نے ہماری طرف کسی کو بھیجا اور ہمیں سوار کر دیا۔ جب ہم انہیں لے کر روانہ ہوئے تو میں نے اپنے ساتھیوں سے کہا: میرا خیال نہیں کہ اس میں ہمارے لیے برکت ہوگی، کیونکہ رسول اللہ ﷺ نے قسم کھائی تھی کہ ہمیں سوار نہیں کریں گے، پھر بھی ہمیں سوار کر دیا۔ چنانچہ ہم آپ ﷺ کے پاس واپس آئے اور آپ ﷺ کو آپ کی قسم کے بارے میں بتایا۔ آپ ﷺ نے فرمایا: ”میں اپنی قسم نہیں بھولا، لیکن جب میں کسی بات پر قسم کھا لوں پھر اس سے بہتر کوئی چیز دیکھوں، تو جو بہتر ہو وہی کرتا ہوں اور اپنی قسم کا کفارہ ادا کر دیتا ہوں۔“

سیدنا عمران بن حصین رضی اللہ عنہ سے روایت ہے کہ رسول اللہ ﷺ نے فرمایا: ”بے شک اللہ عزوجل نے اس دین کو اپنے لیے چن لیا ہے، اور تمہارے دین کے لیے سخاوت اور حسنِ اخلاق کے سوا کوئی چیز مناسب نہیں، سو اپنے دین کو ان دونوں سے آراستہ کرو۔“