المعجم الكبير للطبراني

جبیر بن ابی سلیمان بن جبیر بن مطعم رحمہ اللہ بیان کرتے ہیں کہ وہ سیدنا ابن عمر رضی اللہ عنہما کے ساتھ بیٹھے تھے کہ ان کے پاس سے ایک نوجوان گزرا جس نے صنعانی جبہ پہن رکھا تھا اور اسے گھسیٹتے ہوئے چل رہا تھا۔ سیدنا ابن عمر رضی اللہ عنہما نے کہا: اے نوجوان! ادھر آؤ۔ نوجوان نے کہا: آپ کو کیا ضرورت ہے، اے ابو عبدالرحمٰن؟ انہوں نے کہا: افسوس ہے تجھ پر! کیا تم چاہتے ہو کہ اللہ قیامت کے دن تمہاری طرف نظر (رحمت) فرمائے؟ اس نے کہا: سبحان اللہ! مجھے اس کی خواہش کرنے سے کیا چیز روک سکتی ہے؟ انہوں نے کہا: تو میں نے رسول اللہ ﷺ کو یہ فرماتے سنا ہے: ”اللہ قیامت کے دن اس بندے کی طرف نظر (رحمت) نہیں فرمائے گا جو تکبر سے اپنا تہبند گھسیٹتا ہو۔“ راوی کہتے ہیں: پھر وہ نوجوان مرتے دم تک اپنا کپڑا اونچا کیے ہوئے ہی دیکھا گیا۔

جبیر بن ابی سلیمان بن جبیر رحمہ اللہ بیان کرتے ہیں کہ وہ سیدنا ابن عمر رضی اللہ عنہما کے ساتھ بیٹھے تھے تو انہوں (ابن عمر) نے فرمایا: میں نے رسول اللہ ﷺ کو صبح و شام اپنی دعا میں یہ کہتے سنا، اور آپ ﷺ اسے دنیا سے رخصت ہونے اور وفات پانے تک نہیں چھوڑتے تھے: ”اے اللہ! میں تجھ سے اپنے دین، دنیا، گھر والوں اور مال میں عافیت اور درگزر کا سوال کرتا ہوں۔ اے اللہ! میری پردہ پوشی فرما، اور میرے خوف کو امن میں بدل دے۔ اے اللہ! میری حفاظت فرما میرے آگے سے، اور میرے پیچھے سے، اور میرے دائیں سے، اور میرے بائیں سے، اور میرے اوپر سے، اور میں تیری پناہ چاہتا ہوں کہ نیچے سے دھنسا دیا جاؤں۔“ جبیر بیان کرتے ہیں: ”اور وہ (نیچے سے دھنسائے جانے) سے مراد زمین میں دھنس جانا ہے،“ مجھے نہیں معلوم یہ رسول اللہ ﷺ کا قول تھا یا جبیر کا اپنا۔