المعجم الكبير للطبراني

سیدنا ضمیرہ بن ابی ضمیرہ رضی اللہ عنہ کے دادا سے روایت ہے کہ ایک آدمی نبی کریم ﷺ کے پاس آیا اور کہا: اے اللہ کے رسول، میرا فلاں عورت سے نکاح کروا دیں۔ آپ ﷺ نے فرمایا: ”تمہارے پاس اسے مہر دینے کے لیے اور عطا کرنے کے لیے کیا ہے؟“ اس نے کہا: میرے پاس کچھ نہیں۔ آپ ﷺ نے فرمایا: ”یہ انگوٹھی کس کی ہے؟“ اس نے کہا: میری ہے۔ آپ ﷺ نے فرمایا: ”تو یہی اسے دے دو۔“ اور آپ ﷺ نے اس کا نکاح کروا دیا، اور ایک اور شخص کا نکاح سورۃ البقرہ سکھانے کے بدلے کروا دیا جس کے پاس کچھ نہیں تھا۔

سیدنا ضمیرہ بن ابی ضمیرہ رضی اللہ عنہ کے دادا سے روایت ہے کہ رسول اللہ ﷺ نے فرمایا: ”جو ہمارے چھوٹوں پر رحم نہ کرے، اور ہمارے بڑوں کا حق نہ پہچانے وہ ہم میں سے نہیں، اور جو ہمیں دھوکہ دے وہ ہم میں سے نہیں، اور کوئی مؤمن اس وقت تک مؤمن نہیں ہوتا جب تک اپنے مؤمن بھائیوں کے لیے وہی پسند نہ کرے جو اپنے لیے پسند کرتا ہے۔“