المعجم الكبير للطبراني

سیدنا معاذ بن جبل، ابو عبیدہ بن جراح، عبادہ بن صامت اور شداد بن اوس رضی اللہ عنہم سے روایت ہے کہ رسول اللہ ﷺ نے فرمایا: ”عورت اگر جان بوجھ کر قتل کرے تو اسے اس وقت تک قتل نہ کیا جائے جب تک وہ اپنے پیٹ میں موجود بچہ نہ جن لے، اگر وہ حاملہ ہو، اور جب تک وہ اپنے بچے کے لیے کوئی کفیل مقرر نہ کر لے، اور اگر وہ زنا کرے تو اسے اس وقت تک رجم نہ کیا جائے جب تک وہ اپنے پیٹ میں موجود بچہ نہ جن لے، اور جب تک وہ اپنے بچے کے لیے کوئی کفیل مقرر نہ کر لے۔“

سیدنا شداد بن اوس رضی اللہ عنہ سے روایت ہے، کہتے ہیں: میں نے رسول اللہ ﷺ کو فرماتے سنا: ”جس نے دکھاوے کے لیے نماز پڑھی اس نے شرک کیا، اور جس نے دکھاوے کے لیے روزہ رکھا اس نے شرک کیا، اور جس نے دکھاوے کے لیے صدقہ دیا اس نے شرک کیا۔“

سیدنا شداد بن اوس رضی اللہ عنہ سے روایت ہے کہ رسول اللہ ﷺ نے فرمایا: ”اس امت کے بد ترین لوگ ضرور بالضرور پہلے گزرے ہوئے اہل کتاب کے طریقے پر چلائے جائیں گے، بالکل اسی طرح جیسے تیر کا ایک پر دوسرے پر کے برابر ہوتا ہے۔“

سیدنا شداد بن اوس رضی اللہ عنہ سے روایت ہے کہ نبی کریم ﷺ نے فرمایا: ”عقل مند وہ ہے جو اپنے نفس کا محاسبہ کرے اور موت کے بعد کے لیے عمل کرے، اور عاجز وہ ہے جو اپنے نفس کو اس کی خواہش کے پیچھے لگا دے، اور اللہ پر امیدیں باندھے۔“